जळगाव प्रतिनिधी : नकली नोटा चलनात आणण्यापुर्वीच सचिन दरबारसिंग राजपूत (वय ३४, रा. गजानन महाराज मंदिराजवळ रामेश्वर कॉलनी) व सचिन संजय गोसावी (वय २३, मूळ रा. टिटवी, ता. पारोळा, ह.मु. वाघनगर) या दोघांना स्थानिक गुन्हे शाखेने पर्दाफाश केला. त्यांच्याकडून ३६ हजार ५०० रुपयांच्या नकली नोटा जप्त करण्यात आल्या. ही कारवाई दि. २७ रोजी रात्री आठ वाजेच्या सुमारास जिल्हा रुग्णालय परिसरात केली. याप्रकरणी गुन्हा दाखल झाल्यानंतर जिल्हापेठ पोलिसांनी आणखी एका संशयिताला अटक केली आहे.
शहरातील जिल्हा शासकीय वैद्यकीय महाविद्यालय व रुग्णालय परिसरात दोन संशयित नकली नोटा चलनात आणत असल्याची माहिती स्थानिक गुन्हे शाखेचे कर्मचारी विजय पाटील यांना मिळाली. त्यांनी याबाबत पोलीस निरीक्षक संदीप पाटील यांना माहिती दिल्यानंतर त्यांनी लागलीच उपनिरीक्षक शरद बागल, पोहेकॉ अक्रम शेख, नितीन बाविस्कर, प्रवीण भालेराव, किशोर पाटील, रविंद्र कापडणे यांचे पथक तयार करुन कारवाईच्या सूचना दिल्या. त्यानुसार पथक हे जिल्हा रुग्णालयात परिसरात दाखल झाले. याठिकाणी (एमएच १९, डीयू ७८०८) क्रमांकाच्या वाहनावर दोन संशयित संशयास्पदरित्या उभे होते.
सापळा रचून बसलेल्या पथकाने आवळल्या मुसक्या
सापळा रचून बसलेल्या पथकाने संशयास्पदरित्या उभे असलेल्या दोघ तरुणांना ताब्यात घेतले. त्यांची चौकशी केली. त्यांनी सचिन राजपूत व सचिन गोसावी असे नावे सांगितली. त्यांनी अंगझडती घेतली असता, त्यांच्याकडे ३६ हजार ५०० रुपयांच्या नकली नोटा मिळून आल्या.
नोटा पुरविणाऱ्याला केली अटक
दोघांना ताब्यात घेत जिल्हापेठ पोलीस ठाण्यात आणले, याठिकाणी त्यांच्याविरुद्ध गुन्हा दाखल करण्यात आला आहे. या गुन्ह्याचा उपनिरीक्षक गोपाल देशमुख यांनी कसून चौकशी केली. यावेळी त्यांनी या नकली नोटा विजय प्रभुलाल माहोरे वय (३८, रा. अटलगव्हाण, ता. पाचोरा) याच्याकडून घेतल्याचे सांगितले. त्यानुसार पोलिसांनी विजय माहोरे याला देखील अटक केली. त्यांना न्यायालयाने पाच दिवसांची पोलीस कोठडी सुनावली आहे.
यापुर्वीही उधळला होता पोलिसांनी कट
गेल्या वर्षी देखील जिल्हापेठ पोलिसांनी नकली नोटांचे रॅकेट उद्धवस्थ केले होते. यामध्ये नोटा पुरविणाऱ्यांसह चलनात आणण्यांची साखळी शोधून त्यांना अटक केली होती. त्या प्रकरणाचे धागेदोरे हे मध्यप्रदेशपर्यंत पोहचले होते. आता देखील या गुन्ह्याची धागेदोर शोधण्याचे आवाहन पोलिसांसमोर आहे.
