जळगाव (प्रतिनिधी) शहरासह जिल्ह्यात घरफोडी दुचाकी, मोबाईल चोरी करणाऱ्या रेकॉर्डवरील तीन जणांना स्थानिक गुन्हे शाखेच्या पथकाने अटक केली आहे. या चोरट्यांकडून पोलिसांनी दोन दुचाकी व दोन मोबाईल हस्तगत केल्या आहेत. दोन जणांना शहर पोलिस ठाणे तर एका जणाला एमआयडीसी पोलिसांच्या ताब्यात देण्यात आले आहे.
जिल्ह्यात घरफोडी, चोरी व दुचाकी चोरीच्या गुन्ह्यातील आरोपींचा शोध घेण्याविषयी वरिष्ठांनी सूचना दिल्यानुसार स्थानिक गुन्हे शाखेचे वरीष्ठ पोलिस निरीक्षक किसन नजन पाटील यांनी पथक तयार करुन कारवाईसाठी रवाना केले होते. त्यानुसार या पथकाने संशयित राजू भिमसिंग बारेला (वय- २३) दीपक सुमाऱ्या बारेला (वय- २९ दोघे रा. मधुकर नगर, धरणगाव) यांना ताब्यात घेतले. त्यांच्याकडून जळगाव तालुका पोलिस ठाणे, धरणगाव पोलिस ठाणे येथे दाखल गुन्ह्यातील दोन दुचाकी, एक मोबाईल जप्त करण्यात आला.
पुढील कारवाईसाठी त्यांना जळगाव तालुका पोलिस ठाण्यात हजर करण्यात आले. त्याच सोबतच संशयित रमेश फुलसिंग देवरे (वय २३, रा. जळगाव) याला ताब्यात घेतले. त्याच्याकडून एमआयडीसी पोलिस ठाण्यात दाखल गुन्ह्यातील एक मोबाईल जप्त करून एमआयडीसी पोलिस ठाण्यात हजर करण्यात आले. हे तीनही जण रेकॉर्डवरील गुन्हेगार असून त्यांच्याविरूध्द जळगाव शहरात व जिल्ह्यात वेगवेगळ्या पोलिस ठाण्यात दुचाकी चोरी व घरफोडीचे गुन्हे दाखल आहेत.
ही कारवाई स्थानिक गुन्हे शाखेचे वरिष्ठ पोलीस निरीक्षक किसन नजन पाटील यांच्या मार्गदर्शनाखाली सहायक पोलिस निरीक्षक नीलेश राजपूत, पोउनि गणेश वाघमारे, पोलिस अंमलदार जितेंद्र पाटील, सुधाकर अंभोरे, अकरम शेख, महेश महाजन, संदीप सावळे, नितीन बाविस्कर, नंदलाल पाटील, भगवान पाटील, ईश्वर पाटील, हेमंत पाटील, भारत पाटील, अशोक पाटील यांच्या पथकाने केली.
