अहमदनगर (वृत्तसंस्था) आईच्या डोळ्यासमोर तिघां मुलांचा बुडून मृत्यू झाल्याची हृदयद्रावक घटना जिल्ह्यातील खेड तालुक्यातील खर्डा येथे घडली आहे. मृतांमध्ये दोन मुले आणि मुलीचा समावेश आहे.
याबाबतचे वृत्त ‘साम’ टीव्हीने दिले आहे. वृत्तात म्हटले आहे की, दहावीत शिकणारा कृष्णा परमेश्वर सुरवसे (वय १६ वर्षे), दिपक ज्ञानेश्वर सुरवसे (वय १६ वर्षे) तर आठवीत शिक्षण घेत असलेली सानिया ज्ञानेश्वर सुरवसे (वय १४ वर्षे) अशी या मृत मुलांची नावे आहेत. यामध्ये सानिया आणि दिपक हे सख्खे भाऊ- बहिण आहेत. खर्डा येथून भुमकडे जाणाऱ्या शिर्डी- हैद्राबाद राष्ट्रीय महामार्गा लगत पाझर तलावावर आईसोबत कपडे धुण्यासाठी गेले होते.
सुरूवातीला पाय घसरून पडल्याने मुलगी पाण्यात बुडू लागली. तिला वाचवण्यासाठी दोन्ही मुले पाण्यात उतरली. मात्र पाण्याचा अंदाज न आल्याने तिही बुडू लागली. त्या तिघांना वाचवण्यासाठी मुलांची आई रुपाली ज्ञानेश्वर सुरवसे पाण्यात उतरली. मात्र तत्पूर्वी आरडाओरडा केल्याने रस्त्यावरून जाणारे सरपंच बिबिषन वाघमोडे, चांद पठाण, भाऊसाहेब दिगंबर वाळुंजकर यांच्यामुळे तिचा जीव वाचला.
या घटनेनंतर एकाच चितेवर तिन्ही भावंडांचे अंत्यसंस्कार करण्यात आले. यावेळी कुटूंबियांनी केलेला आक्रोश काळीज चिरडुन टाकणारा होता. मन सुन्न करणाऱ्याा या घटनेने संपूर्ण गावावर शोककळा पसरली असून कुटूंबियांचा आक्रोश काळीज चिरडून टाकणारा होता.
