जळगाव जिल्ह्यातील तिघं कुख्यात गुन्हेगार एक वर्षासाठी स्थानबद्ध !

जळगाव (प्रतिनिधी) जिल्ह्यातील दोन तर अमळनेरातील एका गुन्हेगाराला स्थानबद्ध करण्यात आले आहे. शिवम ऊर्फ दाऊद ऊर्फ शुभम मनोज देशमुख (24, रा.अमळनेर), अशोक वाळू कोळी (36, रा.समता नगर), भूषण ऊर्फ भासा विजय माळी (24, रा.तुकाराम वाडी) अशी स्थानबद्ध संशयीतांची नावे आहेत.

अशोक कोळीविरोधात नऊ गुन्हे
जळगावच्या रामानंदनगर पोलीस स्टेशन हद्दीतील अशोक वाळू कोळी (36, रा.साईबाबा मंदिर जवळ समतानगर, जळगाव) याच्याविरोधात दारुबंदी कायद्यांतर्गत 9 गुन्हे दाखल आहेत. एमपीडीए प्रस्ताव रामानंदनगर पो.स्टे.चे पोलीस निरीक्षक राजेंद्र कुटे यांनी तयार करुन प्रस्ताव हा स्थानिक गुन्हे शाखेकडे सादर केला होता. प्रस्तावाचे अवलोकन केल्यानंतर जिल्हाधिकारी जळगाव यांच्याकडे प्रस्ताव सादर करण्यात आला. 30 मे रोजी जिल्हाधिकारी आयुष प्रसाद यांनी संशयीताला स्थानबद्ध करण्याबाबत आदेश पारीत केला. संशयीताला मध्यवर्ती कारागृह, मुंबई येथे स्थानबद्ध करण्यात आले.

एमआयडीसी हद्दीतील भूषण माळी स्थानबद्ध
एमआयडीसी हद्दीतील भूषण ऊर्फ भासा विजय माळी (24, रा.भई काटयाच्या मागे तुकारामवाडी, जळगाव) विरोधात 13 गुन्हे दाखल आहेत. एमपीडीएचा प्रस्ताव पोलीस निरीक्षक बबन आव्हाड यांनी तयार करीत गुन्हे शाखेला 21 मे रोजी सादर केला. प्रस्तावाचे अवलोकन केल्यानंतर जिल्हाधिकार्‍यांकडे प्रस्ताव आल्यानंतर 30 मे स्थानबद्धतेचे आदेश निघाले. एमआयडीसी पोलीस निरीक्षक बबन आव्हाड, पोलीस उपनिरीक्षक दीपक जगदाळे, पोलीस उपनिरीक्षक दतात्रय पोटे, एएसआय अतुल वंजारी, सचिन पाटील, किशोर पाटील, छगन तायडे, राहुन रगडे, विशाल कोळी, किरण पाटील आदींनी शुक्रवार, 31 मे रोजी संशयीताला ताब्यात घेत मध्यवर्ती कारागृह, कोल्हापूर स्थानबद्ध केले.

अमळनेरातील कुविख्यात शिवम स्थानबद्ध
अमळनेर हद्दीतील शिवम ऊर्फ दाऊद ऊर्फ शुभम मनोज देशमुख (24, रा. पिंपळे रोड, संविधान चौक, लाकडी वखारीचे मागे, अमळनेर) याच्याविरोधात भादंवि अंतर्गत 27 गुन्हे दाखल आहेत. एमपीडीए प्रस्ताव पोलीस निरीक्षक विकास देवरे यांनी गुन्हे शाखेला 1 मे रोजी सादर केला. प्रस्तावाचे अवलोकन केल्यानंतर जिल्हाधिकारी यांच्याकडे प्रस्ताव आल्यानंतर 30 मे स्थानबध्दतेचे आदेश पारीत झाले. अमळनेर पोलीस निरीक्षक विकास देवरे, सहा.निरीक्षक अजित साळवे, किशोर पाटील, चरण पाटील, प्रशांत पाटील, नितीन मनोरे आदींनी संशयीताला शनिवार, 1 जून रोजी ताब्यात घेत मध्यवर्ती कारागृह, ठाणे येथे हलवले.

स्थानबद्धतेकामी यांची भूमिका महत्त्वाची
जळगाव पोलीस अधीक्षक डॉ.महेश्वर रेडी, अपर पोलीस अधीक्षक कविता नेरकर, अपर पोलीस अधीक्षक अशोक नखाते, उपविभागीय पोलीस अधिकारी संदीप गावीत, उपविभागीय पोलीस अधिकारी सुनील नंदवाळकर यांच्या मार्गदर्शनाखाली तत्कालीन एलसीबी निरीक्षक किसन नजनपाटील व त्यांच्या अधिनस्त सहाय्यक फौजदार युनूस शेख इब्राहिम, हवालदार सुनील पंडीत दामोदरे, जयंत भानुदास चौधरी, रफिक शेख कालु, ईश्वर पंडीत पाटील आदींनी प्रक्रिया पार पाडली.