जळगाव (प्रतिनिधी) पंचमुखी हनुमान मंदिर परिसरातील पांडेचाकातील एका हॉस्पिटलमध्ये शस्त्रक्रियेसाठी आलेल्या डॉ. नीरज चौधरी यांच्यासह त्यांच्या दोन सहकाऱ्यांवर कार पार्क करण्यावरून प्राणघातक हल्ला करण्यात आला. नारळ विक्रेत्यासह एका महिलेनेदेखील मी पोलिस आहे, असे म्हणत डॉक्टरांना मारहाण केली. या प्रकरणी एमआयडीसी पोलिस ठाण्यात तीन जणांविरुद्ध गुन्हा दाखल करण्यात आला आहे.
डॉ. निरज चौधरी हे रविवारी सकाळी पावणेदहा वाजेच्या सुमारास ते नीलकमल हॉस्पिटलमध्ये शस्त्रक्रीयेसाठी आपल्या कारने आले होते. त्याच्यासोबत सहकारी अजय सेनानी व मंगेश दांगोडे हे त्यांच्या गाडीतील शस्त्रक्रीयेसाठी लागणारे साहित्य घेवून हॉस्पिटलमध्ये गेले होते. डॉ. निरज चौधरी हे त्यांची गाडी रस्त्याच्याकडेला पार्क करुन हॉस्पिटलमध्ये जात असतांना एक इसम त्यांच्याजवळ आला आणि तो डॉ. चौधरी यांना म्हणाला की, तुम्ही ज्या जागेवर गाडी पार्क केली आहे, त्या जागेवर मी नारळाची गाड़ी लावतो. त्यामुळे तुम्ही गाडी काढून घ्या. त्यावर डॉ. चौधरी यांनी त्याला रस्त्यावर दुसरीकडे रस्त्यावर कार लावायला जागा नाही. ती जागा सार्वजनिक असून तुला काही तक्रार असेल तर तू पोलिसांना कळव, असे म्हणत डॉ. चौधरी हॉस्पिटलमध्ये शस्त्रक्रीया करण्यासाठी निघून गेले.
तरुणाकडून डॉक्टरांच्या वाहनाची तोडफोड !
दहा ते पंधरा मिनिटांनंतर हॉस्पिटलमधील कर्मचारीने डॉ. निरज चौधरी यांच्याकडे येवून नारळाची हातगाडी लावणारा ईसम तुमच्या कारची तोडफोड करत आहे. तुम्ही खाली, असे सांगितले. डॉ. चौधरी हे त्यांच्या गाडीजवळ आले. यावेळी नारळाची गाडीवाला आणि त्याच्यासोबत असलेला एक जण, असं दोघे डॉक्टरांच्या अंगावर धावून आले. त्या दोघांना अजय सेनानी व मंगेश दांगोळे यांनी त्यांना बाजूला करण्याचा प्रयत्न केला असता, त्यांनी त्या दोघांना देखील मारहाण केली आणि हातातील कोयत्याने मंगेश दांगोडेच्या हाताला दुखापत केली.
पोलीस असल्याचे सांगत महिलेकडूनही मारहाण !
हा वाद सुरु असतांना एक महिला शिवीगाळ करीत त्याठिकाणी आली. तीने तु माझ्या आईला नारळाची गाडी का लावू देत नाही?, मी पोलीस आहे तुला काय करायचे ते कर असे म्हणत त्या महिलेने डॉ. चौधरी यांना मारहाण केली.
पोलिसांसोबत हुज्जत घातल्यानंतर झाले पसार !
घटनेची माहिती पोलिसांना मिळताच दोन पोलिस कर्मचारी त्याठिकाणी आले. त्या पोलीस कर्मचाऱ्यासोबत त्या दोघ तरुणांनी हुज्जत घालून ते तेथून पसार झाले. डॉ. चौधरी यांनी दिलेल्या तक्रारीवरुन अर्जुन राठोड, सोनू चव्हाण या दोघांसह शिल्पा राठोड या महिला पोलीसाविरुद्ध एमआयडीसी पोलीस ठाण्यात गुन्हा दाखल करण्यात आला आहे. पुढील तपास पोलीस उपनिरीक्षक दत्तात्रय पोटे हे करीत आहे.
