भुसावळ (प्रतिनिधी) – शहरातील ग्रीन पार्क परिसरात किरकोळ कारणावरून झालेल्या वादाचे रूपांतर हिंसक घटनेत झाले. एका तरुणाने तिघांवर चाकूने हल्ला केल्याची घटना दि. १९ जून रोजी रात्री घडली. या प्रकरणी बाजारपेठ पोलिस ठाण्यात एकाविरुद्ध गुन्हा दाखल करण्यात आला आहे.
याबाबत सय्यद शाहिद सय्यद शाबीर (वय २२, रा. खडका रोड, ३२ खोली, भुसावळ) यांनी फिर्याद दिली. त्यांच्या तक्रारीनुसार अमीर (पूर्ण नाव उपलब्ध नाही, रा. खडका रोड, पटेल कॉलनी, भुसावळ) याच्याविरुद्ध गुन्हा नोंद करण्यात आला आहे. पोलिसांनी दिलेल्या माहितीनुसार, १९ जून रोजी रात्री सुमारे ११ वाजता ग्रीन पार्क कॉलनीतील अन्जनबी शकीला शाळेजवळील मोकळ्या जागेत ही घटना घडली. संशयित अमीर याने फिर्यादी शाहिद यांना अडवून त्यांच्यावर चाकूने वार केला. या हल्ल्यात शाहिद जखमी झाले. दरम्यान, शाहिद यांच्या मदतीसाठी धावून आलेल्या त्यांच्या मित्रांनाही संशयिताने लक्ष्य केले. राघव सूर्यवंशी यांच्या पोटावर, तर आकीब सय्यद यांच्या हातावर चाकूने वार करून त्यांना जखमी करण्यात आले. घटनेनंतर परिसरात काही काळ तणावाचे वातावरण निर्माण झाले होते. माहिती मिळताच बाजारपेठ पोलिसांनी घटनास्थळी धाव घेऊन परिस्थिती नियंत्रणात आणली. जखमींवर उपचार करण्यात आले असून तिघांचीही प्रकृती सध्या स्थिर असल्याचे सांगण्यात आले. या प्रकरणाचा पुढील तपास बाजारपेठ पोलिस करीत आहेत.
