धरणगाव (प्रतिनिधी) तालुक्यातील बॅन्ड व्यावसायिक, मालक, कलाकार यांच्यावर उपासमारीची वेळ आली असून काढलेले कर्ज भरण्यासाठी पुन्हा कर्ज काढावे लागत आहे. म्हणून बॅन्ड वाजविण्यावरील बंदी उठविण्यात यावी, अशी मागणी बॅन्ड युनियनतर्फे तहसीलदार यांचेकडे करण्यात आली आहे.
दि. ३० मार्च रोजी धरणगाव पोलिस स्थानकाचे पोलिस निरीक्षक यांचे प्रतिनिधी गणेश अहिरे व धरणगाव तहसिल कार्यालयाचे नायब तहसिलदार प्रथमेश मोहोड यांना बॅन्ड युनियनतर्फे निवेदन देण्यात आले. कोरोनाचा वाढता प्रादुर्भाव लक्षात घेता धार्मिक, सामाजिक, राजकीय व लग्न समारंभ यांच्यावर बंदी घालण्यात आली आहे. या बंदीमुळे बॅन्ड व्यावसायिक, मालक, कलाकार यांना उदरनिर्वाह करणे कठीण झाले असून विविध कार्यक्रमांवरील बंदी उठवावी व बॅन्ड वाजविण्यास परवानगी द्यावी, यासाठी निवेदन देण्यात आली. याप्रसंगी महाराष्ट्र बॅन्ड कलाकार उत्कर्ष संस्था या युनियनचे ता. उपाध्यक्ष शिवनारायण हरणे, सल्लागार सलीम मास्टर, अमोल गजरे, सुनिल मगरे, जाकीर मास्टर, समाधान चित्ते आदी उपस्थित होते.