अकोला (वृत्तसंस्था) हिवरखेड येथील युवा शेतकरी गोपाल उर्फ दिनेश रमेश राठी यांचा दुर्दैवी मृत्यू झाल्याची घटना नुकतीच घडली आहे. गोपाल उर्फ दिनेश रमेश राठी ( वय अंदाजे ४०), असे मृत शेतकऱ्याचे नाव आहे.
हिवरखेड येथील युवा शेतकरी गोपाल उर्फ दिनेश रमेश राठी यांची गोर्धा, तळेगाव परिसरात शेती आहे. सोमवार २८ ऑगस्ट रोजी पहाटे ते हिवरखेड येथील आपल्या घरून मुंजा वाट या बहुचर्चित पांदण रस्त्याने आपल्या शेताकडे छोट्या ट्रॅक्टरने जात होते. मुंजा वाट या पांदन रस्त्यावरील मुरूमाचा गंज ठेकेदाराने हलगर्जी पणा करून तसाच ठेवल्यामुळे व सदर मुरूम रस्त्यावर व्यवस्थित दबाई करून योग्यप्रकारे दुरुस्ती न केल्यामुळे ट्रॅक्टर पलटी होऊन या अपघातात गोपाल राठी या निरपराध शेतकऱ्याचा दुर्दैवी मृत्यू झाला. जर संबंधित यंत्रणेने व ठेकेदाराने या पांदन रस्त्याचे योग्य काम केले असते. आणि मुरुमाचा ढीग तसाच रोडवर पडू दिला नसता तर ही दुर्दैवी घटना कदाचित घडली नसती.
