भडगाव (प्रतिनिधी) च्युईंगम घशात अडकल्याने शाळकरी मुलाचा दुर्दैवी मृत्यू झाल्याची धक्कादायक घटना भडगाव तालुक्यात घडल्याने खळबळ उडाली आहे. उमेश गणेश पाटील (१५, पांढरद ता. भडगाव) असे या विद्यार्थ्याचे नाव आहे. तो भडगाव येथील लाडकुबाई विद्यामंदिर या शाळेत इयत्ता नववीत शिकत होता.
यासंदर्भात अधिक असे की, गुरुवारी शाळा सुटल्यानंतर त्याने च्युईगम घेतली आणि गावी जाण्यासाठी रिक्षात बसला. ही च्युइंगम त्याच्या श्वासनलिकेत अडकली. त्यामुळे त्याला अस्वस्थ वाटू लागले. त्याला भडगाव येथे खाजगी दवाखान्यात आणण्यात आले. तेथील डॉक्टरांनी त्याला पाचोरा येथे घेऊन जाण्यास सांगितले. त्याला पाचोरा येथे नेत असतानाच वाटेतच त्याची प्राणज्योत मालविली. गुरुवारी त्याचा गणिताचा पेपर होता. त्याने परीक्षा दिली. दुपारी च्युइंगम चघळत असतानाच हा प्रकार घडल्याचे शाळेच्या सूत्रांनी सांगितले. उमेश याचे वडील गणेश पाटील हे शेतकरी आहेत. या घटनेमुळे हळहळ व्यक्त होत आहे.
