जळगाव (प्रतिनिधी) येथील महापालिकेच्या प्रशासकीय कामकाजाची गती वाढविण्यासाठी आयुक्तांनी महत्त्वाचा निर्णय घेत विविध विभागांतील २० अधिकारी व कर्मचाऱ्यांच्या तात्पुरत्या स्वरूपात बदल्या केल्या आहेत. या बदल्यांमुळे आस्थापना, आरोग्य, महसूल, विद्युत, मार्केट व अतिक्रमण निर्मूलन विभागांतील कामकाज गतिमान करण्याचा प्रयत्न आहे.
बदल्यांच्या आदेशात आस्थापना अधीक्षक लक्ष्मण सपकाळे यांच्याकडे आरोग्य विभागातील वरिष्ठ लिपिक पदाची जबाबदारी देण्यात आली आहे. त्यांच्या जागी अनुभा भट यांना पदाचा कार्यभार सोपविला आहे. त्यांचा पदभार भाऊसाहेब बागुल यांच्याकडे सोपविण्यात आला आहे. भोजराज काकडे यांच्याकडे मुळ कारभार सांभाळून महसूल उपायुक्त यांचे स्वीय सहायक म्हणून अतिरिक्त कार्यभार देण्यात आला आहे. कनिष्ठ अभियंता एस. एस. पाटील यांच्याकडे प्रभाग समिती कार्यालय क्रमांक दोनच्या प्रभाग अधिकारी पदाची धूरा देण्यात आली असून मिळकत व्यवस्थापन विभागाचा अतिरिक्त पदभार त्यांच्याकडे देण्यात आला आहे. गौरव सपकाळे यांच्याकडे मार्केट वसुली अधिक्षक या मूळ पदासह मिळकत व्यवस्थापन, घरकुल वसुली, भाडे पट्टे व व्यवसाय परवाना विभागांची जबाबदारी देण्यात आली आहे. संजय ठाकुर यांच्याकडे आस्थापना अधीक्षक पदासह जाहिरात परवाना व नियंत्रण विभागाची जबाबदारी देण्यात आली आहे. चेतन ठाकरे यांच्याकडे जाहिरात परवाना व नियंत्रण विभाग, तर राहुल सुशील यांना जन्म-मृत्यू विभागात प्रभारी पदभार देण्यात आलेला होता. आता त्यांच्याकडील महिला व बालकल्यान विभागाचा पदभार काढून जन्म मृत्यू नोंदणी विभागाचा पुर्णवेळ पदभार देण्यात आला आहे. तसेच मंगेश पाटील यांची प्रभाग समिती क्रमांक एक मधून आस्थापना विभागात बदली झाली असून यांच्याह अन्य कर्मचाऱ्यांच्या देखील बदल्या झाल्या आहेत.
