जळगाव (प्रतिनिधी) मुक्ताईनगर तालुक्यातील वडोदा वन क्षेत्रात वृक्ष तोड करणाऱ्या दोघांना अटक करण्यात आली आहे.
या संदर्भात अधिक असे की, वडोदा वनक्षेत्रातील क्षेत्र राजुरा क.नं. ५६५ मध्ये अज्ञात इसमाने रात्री वनात प्रवेश करून अवैध वृक्षतोड केली होती. सदर घटनेबाबत भारतीय वन अधिनियम १९२७ चे कलम २६ अन्वये गुन्हा नोंद केला आहे. सदर गुन्ह्याचा अधिक तपास केला असता गुन्ह्यातील फरार आरोपी सुभाष भावसिंग पावरा, नानाभाऊ राजमल पावरा (दोघं रा. धुळे, पावरी वाडा ता.मुक्ताईनगर जि.जळगाव) यांना चौकशीसाठी ताब्यात घेऊन अटक करण्यात आली आहे. वनपरिक्षेत्र अधिकारी अतिक्रमण निर्मूलन जळगावचे राजेंद्र राणे तसेच वनपरिक्षेत्र अधिकारी वडोदा आशुतोष बच्छाव यांनी घटनास्थळी भेट देऊन झालेल्या अवैध वृक्षतोडची जागेवर जाऊन पाहणी केली आहे. दोघां आरोपींना मुक्ताईनगर न्यायालयात हजर करण्यात येणार आहे.
