चाळीसगाव (प्रतिनिधी) वरिष्ठ पोलीस अधिकारी आणि न्यायपालिकेतील वरिष्ठांच्या नावाने सुपारी व्यापाऱ्यांकडून खंडणी उकळण्यात आली होती. याप्रकरणी आता पोलिसांनी चाळीसगाव येथील संतोष मानधनिया याला ताब्यात घेतले असून दोन हवाला व्यावसायिक यांनाही अटक केली आहे. नरेश परमार आणि स्तन राणा (हवाला) तसेच संतोष मानधनिया अशी या तिघांची नावे आहेत. दरम्यान, यातील मुख्य आरोपी सौरभ केसवानी अद्याप फरार आहे.
सुपारी व्यापारी अनुप महेशचंद्र नगरिया याला २७ जानेवारीला पोलिसांनी अटक केली होती. तो कारागृहात पोहोचल्यानंतर आरोपी मनोज वंजानी आणि अशोक वंजानी यांनी अनुपचे इंदोर (मध्य प्रदेश) निवासी मोठे बंधू अनिल यांना, ”आता तुझा भाऊ कारागृहातून कधीच बाहेर येणार नाही” त्याला बाहेर काढायचे असेल तर वरिष्ठ पोलीस अधिकारी आणि न्यायपालिकेतील वरिष्ठांशी संधान साधावे लागेल, असे सांगून ६० लाखांची खंडणी मागितली. हे काम जळगावमधील सौरभ केसवानी हा करून देतो, अशी थाप मारली. सौरभचे व्हॉटसॲप कॉलवर नगरियासोबत बोलणे करून दिले. त्याच्यावर विश्वास ठेवून नगरिया यांनी ३० जानेवारीला वंजानीच्या मेयो चौकातील वासन वाईन शॉपमध्ये ३० लाख रुपये आणून दिले. नंतर ते ३० लाख सौरभ केसवानीकडे पोहोचविण्यात आले.
असे फुटले बिंग
दरम्यान, अनुप नगरियाला जामीन मिळाला अन् आरोपी त्याच्या व मोठ्या भावाच्या मागे उर्वरित ३० लाख रुपये मिळावे म्हणून तगादा लावू लागले नगरिया यांनी आपल्या व्यापारी मित्रांना हा प्रकार सांगितला. त्याची कुणकुण पोलीस आयुक्त अमितेशकुमार यांना लागली. अमितेशकुमार यांनी अनुप नगरियाकडे चौकशी केली असता त्यांनी या संपूर्ण प्रकरणाची माहिती देऊन सोमवारी तशी तक्रार नोंदवली. त्यावरून तपासाची चक्रे फिरवून पोलिसांनी या दोघांना ताब्यात घेतले. वंजानी बंधूनी दिलेल्या माहितीच्या आधारे पोलीस पथके चाळीसगाव, जळगाव, सूरतमध्ये पोहोचली. इकडे परमार आणि राणाला अटक करण्यात आली, तर तिकडे चाळीसगावमध्ये मानधनीयाला अटक करण्यात आली. त्यांना आज नागपुरात आणून न्यायालयात हजर करण्यात आले. परमार आणि राणा इतवारी, गांधीबागमध्ये हवालाचा व्यवसाय करतात, तर संतोष हा चाळीसगाव (खान्देश) येथे हवाला चालवतो. या प्रकरणातील मुख्य आरोपी सौरभ केसवानी फरार आहे.
