बीड (वृत्तसंस्था) मॉर्निंग वॉकसाठी गेलेल्या दोघांना अज्ञात वाहनाने धडक दिल्याची घटना (दि.२० रविवार) रोजी गेवराई – शेवगाव राज्यमार्गावर उमापूरजवळ पहाटे पाच वाजेच्या दरम्यान घडली. या अपघातात उमापूर येथील आडतचे प्रसिद्ध व्यापारी गोपाळ माधवराव राऊत (वय ५२ वर्षे) यांचा जागीच मृत्यू झाला तर त्यांच्या सोबत असलेले मनोज पाटनी हे गंभीर जखमी झाले आहेत.
रविवार रोजी नेहमी प्रमाणे पहाटे साडेचारच्या दरम्यान मॉर्निंग वॉकला गेवराई- शेवगाव राज्यमार्गावर गोपाळ राऊत व मनोज पाटनी हे गेले होते. उमापूर जवळील हवाले नर्सरीच्या पूढे गेल्यानंतर त्यांना शेवगाव कडून गेवराई कडे जाणाऱ्या पीकअप वाहनाने पाठीमागून जोराची धडक दिली. यामध्ये गोपाळ राऊत यांचा जागीच मृत्यू झाला तर सोबत असलेले मनोज पाटनी हे गंभीर जखमी झाले आहेत.
अपघातानंतर घटनास्थळावरून वाहनचालकाने वाहनासह पळ काढला. याप्रकरणी अज्ञात वाहनावर गुन्हा दाखल करण्यात आला असून, पोलीस तपास करत आहेत. गोपाळ राऊत हे प्रसिद्ध व्यापारी होते तसेच उमापूर ग्रामपंचायतचे माजी सदस्य तथा सेवा सहकारी सोसायटीचे संचालक होते. त्यांच्या पश्चात्त पत्नी, दोन मुले, मुलगी, भाऊ असा परिवार आहे.
