साक्री (वृत्तसंस्था) शहराजवळील कान नदीवरील केटीवेअरमध्ये पोहायला गेलेल्या दोघा शाळकरी विद्यार्थ्यांचा पाण्यात बुडून मृत्यू झाल्याची घटना घडली आहे. या घटनेमुळे शहरासह तालुक्यात हळहळ व्यक्त होत आहे. याप्रकरणी साक्री पोलीस ठाण्यात अकस्मात मृत्यूची नोंद करण्यात आली आहे.
यासंदर्भात, शहरातील दत्त कॉलनीतील रहिवासी तनय प्रशांत खैरनार (१६) व सिद्धेश राकेश पाटील रा. गोपाळ नगर साक्री हे दोघेही दि.२० रोजी दुपारपासून घरात कुणाला काहीही न सांगता घराबाहेर पडले होते. परंतु उशिरापर्यंत घरी न परतल्याने दोघांच्या पालकांनी व कॉलनीतील तरुणांनी दोघांचा शोध घेण्यास सुरुवात केली. परंतु शोध करूनही दोघे आढळून आले नाहीत. काल (दि.२१) कान नदीपात्रात केटीवेअरजवळ एका व्यक्तीस पाण्यात एका शाळकरी मुलाचा मृतदेह तरंगताना दिसला. तसेच दोन विद्यार्थ्यांचे कपडे व चपला केटीवेअरच्या बाजुला दिसून आल्या.
या घटनेची माहिती मिळताच पोलीस घटनास्थळी दाखल झाले. या घटनेची वार्ता शहरात कळताच कॉलनीतील मित्रमंडळी, विविध पदाधिकाऱ्यांनी धाव घेतली. मृतदेह पाण्याबाहेर काढल्यावर तो सिध्देश राकेश पाटील याचा असल्याची ओळख पटली. मृतदेह उत्तरीय तपासणीसाठी साक्री ग्रामीण रुग्णालयात पाठविण्यात आला. मात्र, तनय प्रशांत खैरनार हा आढळून आला नव्हता. त्यामुळे केटीवेअरमध्ये त्याचा शोध घेण्यात आला असता तनय खैरनार याचाही मृतदेह सापडला. त्याचा मृतदेह उत्तरीय तपासणीसाठी रुग्णालयात रवाना करण्यात आला. याप्रकरणी साक्री पोलीस ठाण्यात अकस्मात मृत्यूची नोंद करण्यात आली आहे. तनय व सिध्देश हे दोघेही घरात काहीही न सांगता कान नदीवरील केटीवेअरमध्ये पोहण्यासाठी गेले होते. परंतु दोघांचाही पाण्यात बुडून दुदैवी मृत्यू झाल्याच्या घटनेमुळे शहरासह तालुक्यात हळहळ व्यक्त करण्यात येत आहे.
