अमळनेर (प्रतिनिधी) – एसटी बसमध्ये चढताना महिलेची सोन्याची पोत चोरणाऱ्या दोघा महिलांना अवघ्या दोन तासात पोलिसांनी मालेगाव येथून अटक केली आहे.
शिरुड येथील कल्पनाबाई अशोक – शिंपी (वय ६५) ही महिला ९ रोजी सकाळी ११ वाजेच्या सुमारास अमळनेर बसस्थानकावरून शिरूड जाण्यासाठी मुकटी बसमध्ये चढत होती. बसमध्ये चढताना गर्दी असल्याने ओढाताण झाली. महिला बसमध्ये चढल्यानंतर त्यांना गळ्यातील १५ हजाराची ३ ग्रॅमची सोन्याची पोत गायब झाल्याचे समजले. या प्रकरणी महिलेने अमळनेर पोलिसात तक्रार केली. फिर्याद दाखल होत नाही त्यापूर्वीच पो.नि. दत्तात्रय निकम यांनी तातडीने दखल घेत पो. उ.नि. शरद काकळीज, प्रशांत पाटील, सूर्यकांत साळुंखे, उज्ज्वलकुमार म्हस्के, नितीन कापडणे, उज्ज्वल पाटील, नितीन मनोरे यांच्या पथकाला चोरट्यांचा शोध घ्यायला पाठवले. पोलिसांनी बसस्थानक आणि बाहेरील सीसीटीव्ही फुटेज तपासले असता त्यांना दोन संशयित महिला बसजवळ आणि बाहेर रिक्षामध्ये बसतांना आढळल्या. पोलिसांनी तातडीने रिक्षाचा पाठलाग केला. मालेगावजवळ या रिक्षाला महिलांसह पकडण्यात आले. शारदा सुनील कसबे (वय ३५) व माया श्रावण कांबळे (वय ५५, रा. एकविरा माता मंदिराजवळ, धुळे) असे त्या महिलांचे नाव आहे. या महिलांनी चोरी करण्यासाठी भाड्याने रिक्षा केली होती, अशी माहिती पोलिसांना मिळाली. चोरीनंतर अवघ्या २ तासात आरोपींना पकडल्याने पोलिसांचे कौतुक होत आहे.
