कोलकाता (वृत्तसंस्था) स्वातंत्र्य सैनिक बिरसा मुंडा यांचा पुतळा समजून आदिवासी समाजाच्या दुसऱ्याच नेत्याच्या पुतळ्याला हार घातल्याने केंद्रीय गृहमंत्री व भाजपचे वरिष्ठ नेते अमित शहा यांच्यावर टीकेची झोड उठली असून प. बंगालमध्ये राजकीय वातावरण तापले आहे.
याबाबत ‘द वायर’ने दिलेल्या आपल्या वृत्तात म्हटले आहे की, प. बंगालच्या दोन दिवसांच्या दौऱ्यावर असलेले अमित शहा यांनी गुरुवारी आदिवासी बहुल बांकुरा येथे स्वातंत्र्य सैनिक बिरसा मुंडा यांच्या पुतळ्यावर हार घालण्याऐवजी दुसऱ्याच आदिवासी नेत्याच्या पुतळ्याला हार घातला. जेव्हा चूक भाजपच्या पदाधिकार्यांना समजली तेव्हा त्यांनी तातडीने बिरसा मुंडा यांची प्रतिमा मागवली व ती पुतळ्याच्या पायाशी ठेवून त्याच्यावर फुले वाहण्याचा कार्यक्रम शहा यांच्या हस्ते उरकून घेतला. पण जेव्हा हा प्रकार लक्षात आला तेव्हा ‘भारत जकात माझी परगना महल’ या आदिवासी संघटनेने या कार्यक्रमावर आक्षेप घेत भाजपने बिरसा मुंडा व आदिवासी समाजाच्या भावना दुखावल्याचा आरोप केला. भाजपने आम्हाला फसवले, त्यांच्या अशा कृतीने आम्ही अत्यंत दुःखित झाल्याची प्रतिक्रिया दिली. या घटनेनंतर स्थानिक आदिवासी कार्यकर्त्यांनी या मूर्तीवर गंगाजल घालून ती शुद्ध केली, असेही या संघटनेने सांगितले. तर दुसरीकडे आगामी विधानसभा निवडणुका डोळ्यासमोर ठेवून भाजपचे असे प्रयत्न सुरू असल्याची टीका तृणमूल काँग्रेसने भाजपवर केली आहे. अमित शहा हे बाहेरचे असून ते बंगाली संस्कृतीबाबत इतके अनभिज्ञ आहेत की त्यांना भगवान बिरसा मुंडा यांचा पुतळा माहिती नाही. त्यांनी वेगळ्याच पुतळ्याला हार घालून सर्वांचा अपमान केला, असे म्हटले आहे.
