जळगाव (प्रतिनिधी) शहरातील शाहू नगरात राहणाऱ्या बांधकाम करणाऱ्या तरूणाचा विजेच्या धक्क्याने जागीच मृत्यू झाल्याची घटना कालिंका माता मंदीर परिसरात बुधवारी २१ मे रोजी दुपारी १ वाजेच्या सुमारास घडली आहे. शेख समीर शेख राज मोहम्मद (वय-२२) रा. इंदिरा नगर, शाहू नगर, जळगाव असे मृत झालेल्या तरूणाचे नाव आहे.
समीर हा आपल्या आई सायराबी शेख व लहान भावासोबत शाहू नगरातील इंदिरानगरात वास्तव्याला होता. बांधकामाच्या ठिकाणी मिस्तरीचे काम करून आपला उदरनिर्वाह करत होता. सध्या त्याचे कालिंका माता मंदिर परिसरात बांधकामाचे काम सुरू होते.
बुधवारी दुपारी १ वाजता बांधकामाच्या ठिकाणी असलेल्या बोअरवेल वायरला स्पर्श झाल्याने समीरला विजेचा जोरदार धक्का बसला. ही घटना घडल्यानंतर स्थानिक नागरिक व बांधकाम करणाऱ्या कामगारांनी त्वरित वीज पुरवठा बंद करून तातडीने समीरला शासकीय वैद्यकीय महाविद्यालयात दाखल केले. मात्र तपासणी करून वैद्यकीय अधिकाऱ्यांनी त्याला मृत घोषित केले. मयत तरुणाच्या पश्चात आई व लहान भाऊ असा परिवार आहे.
