जळगाव (प्रतिनिधी) गिरणा नदीपात्रात हात-पाय धुण्यासाठी गेलेल्या किशोर श्रावण मराठे ( वय ४०, म्हसावद ) या मजुराचा पाय घसरुन नदीतील डोहात बुडून त्याचा मृत्यू झाल्याची दुर्देवी घटना मंगळवारी दुपारच्या सुमारास उघडकीस आली. बराच वेळ पट्टीच्या पोहणाऱ्यांनी शोध घेतला मात्र त्याचा मृतदेह मिळून येत नसल्याने अखेर आपत्ती व्यवस्थापन विभागाच्या पथकाला पाचारण करण्यात आले. या पथकाने शोध घेतल्यानंतर सायंकाळी पाच वाजेच्या सुमारास त्याचा मृतदेह मिळून आला.
पाय घसरला आणि नदीपात्रातील डोहात पडला !
जळगाव तालुक्यातील म्हसावद येथे किशोर मराठे हे वास्तव्यास होते. तसेच गावात हात मजूरीसह मिळेल ते काम करुन आपल्या कुटुंबाचा उदनिर्वाह करीत होता. मंगळवारी सकाळी ९ वाजता घरातून निघाले, त्यानंतर सकाळी १०.३० वाजेच्या सुमारास गिरणा नदीपात्रात हात-पाय धुण्यासाठी गेले असता. त्याठिकाणी अचानक त्यांचा पाय घसरला आणि ते नदीपात्रातील डोहात पडले. डोहाची खोली अधिक असल्याने, त्यांना बाहेर निघणे शक्य न झाल्यामुळे त्यांचा बुडून दुर्देवी मृत्यू झाला. त्यांच्या पश्चात आई, पत्नी, २ मुलगी, २ भाऊ असा परिवार आहे.
कपडे धुणाऱ्या महिलांच्या लक्षात आली घटना !
नदीकाठावर गावातील महिला कपडे धुण्यासाठी आल्या होत्या. त्यांना नदीपात्रात कोणीतरी बुडत असल्याचे दिसताच त्यांनी लागलीच घटनेची माहिती गावचे सरपंच यांना दिली. त्यांनी लागलीच घटनास्थळी धाव घेत गावातील पट्टीच्या पोहणाऱ्यांनी नदीपात्रात किशोर मराठे यांचा शोध घेण्यास सुरुवात केली. मात्र दुपारपर्यंत त्यांचा मृतदेह हाती लागला नाही.
जिल्हा आपत्ती व्यवस्थापन विभागाच्या पथकाने शोधला मृतदेह !
पट्टीच्या पोहणाऱ्यांनी बराच वेळ शोध घेतल्यानंतर देखील किशोर मराठे यांचा मृतदेह मिळून आला नाही. त्यानंतर पोलिसांनी जिल्हा आपत्ती व्यवस्थापन विभागाच्या पथकाला पाचारण करण्यात आले. सायंकाळी ५ वाजता पथकातील कर्मचाऱ्यांच्या अथक प्रयत्नानंतर मृतदेह सापडला, जिल्हा रुग्णालयात मृतदेह दाखल केल्यानंतर सायंकाळी मृतदेहाचे शवविच्छेदनासाठी दाखल करण्यात आला होता. याप्रकरणी एमआयडीसी पोलीस स्टेशन येथे अकस्मात मृत्यूची नोंद करण्यात आली आहे.
