जळगाव (प्रतिनिधी) घराकडे पायी निघालेल्या रंजना उत्तम येसे (५३,रा. म्हाडा कॉलनी) या महिलेला मागून भरधाव आलेल्या क्रेनने चिरडल्याची घटना एमआयडीसी परिसरातील माधुरी वेअर हाऊसनजीक आज (शुक्रवार) सकाळी घडली.
रंजना येसे या मुलगा विकास आणि सून यांच्यासोबत म्हाडा कॉलनी येथे वास्तव्याला होत्या. रंजना येसे यांचे राका चौकात लॉंड्री दुकान आहे. कपडे इस्त्री करून त्या कुटुंबाचा उदरनिर्वाह करत होत्या. आज शुक्रवारी सकाळी ९ वाजेच्या सुमारास त्यांनी लाँड्रीचे दुकान उघडले. त्यानंतर साफसफाई करून घरी जाण्यासाठी पायी निघाल्या. साधारण सव्वा नऊ वाजेच्या सुमारास एमआयडीसी परिसरातील माधुरी वेअर हाऊसजवळून जात असताना मागून भरधाव येणा-या क्रेनने (एम.एच. ४० पी. २३०९) त्यांना जोरदार धडक दिली. क्रेनचे पुढील चाक त्यांच्या अंगावरून गेल्याने त्यांचा जागीच मृत्यू झाला. घटनेनंतर नागरिकांनी त्याठिकाणी धाव घेवून महिलेला वाहनातून जिल्हा रूग्णालयात हलविले. त्यानंतर क्रेन चालकाला पकडून एमआयडीसी पोलिसांच्या ताब्यात दिले.
