बारामती (वृत्तसंस्था) येथील चिमुरड्या भाऊ-बहिणीने एकत्र प्राण गमावले आहेत. कालव्याजवळ सायकल खेळताना कॅनलमध्ये पडून दोघांचा मृत्यू झाला. या घटनेमुळे संपूर्ण परिसरात खळबळ उडाली आहे.
मिळालेल्या माहितीनुसार, पुणे जिल्ह्यातील हवेली तालुक्यातील सोरतापवाडी इथे जुना बेबी कालव्याजवळ दोघेजण सायकल खेळत होते. यावेळी दोन सख्ख्या बहिण-भावाचा कॅनलमध्ये पडून मृत्यू झाला. जागृती दत्ता ढवळे आणि शिवराज दत्ता ढवळे असं मृत्यू झालेल्या बहिण-भावाचं नाव आहे. या घटनेची माहिती मिळताच तातडीने दोघांना उपचारासाठी नेलं असता दोघांचाही मृत्यू झाला असल्याची माहिती डॉक्टरांकडून देण्यात आली आहे. या प्रकरणाची पोलिसांत नोंद केली असून नेमकी मुलं पाण्यात कशी पडली याचा शोध सुरू असल्याचं सांगण्यात येत आहे. दरम्यान, या घटनेमुळे कुटुंबियांना मात्र मोठा धक्का बसला आहे.
