जळगाव (प्रतिनिधी) बी.एड, एम.एड अभ्यासक्रमाची सीईटी २१ ते २३ ऑक्टोंबरच्या दरम्यान होणार आहेत. अंतिम वर्षाच्या विद्यापीठ परीक्षा देखील याच काळात आहेत. त्यामुळे विद्यार्थ्यांचे शैक्षणिक नुकसान होऊ नये म्हणून अंतिम वर्षाच्या विद्यापीठ परीक्षा पुढे ढकला, अशी मागणी राष्ट्रवादीचे अँड.कुणाल पवार यांनी कुलगुरू पी पी.पाटील यांच्याकडे एका निवेदनाद्वारे केली होती. विद्यापीठाने आज या परीक्षा पुढे ढकलल्याचे परिपत्र काढल्यामुळे राष्ट्रवादीच्या मागणीला यश मिळाल्याची प्रतिक्रिया अँड. पवार यांनी दिली आहे.
अॅड. कुणाल पवार यांनी दिलेल्या निवेदनात म्हटले आहे की, अंतिम वर्षाच्या पदवी व पदव्युत्तर अभ्यासक्रमाचे बरेच विद्यार्थी बी.एड,एम.एड अभ्यासक्रमाची सीईटी देतात. तेव्हाच त्यांचावरील अभ्यासक्रमाचा प्रवेश महाराष्ट्र शासन मान्यता देते. तथापी सदरची सीईटी २१ ते २३ ऑक्टोंबरच्या दरम्यान असल्यामुळे बरेच विद्यार्थी या परिक्षेपासून वंचित राहतील. त्यामुळे वरील दिवशी असलेल्या विद्यापीठ परीक्षा तात्काळ पुढे ढकलाव्यात किंवा त्यांना परीक्षा देण्यासाठी पुढील मुदत मिळावी, असे म्हटले होते.
दुसरीकडे आज विद्यापीठाने दिलेल्या परिपत्रकात म्हटले आहे की, शासन पत्राच्या अनुसार दि. २१,२२,२३,२८ व २९ ऑक्टोबर रोजी बी.एड व एमसीए अभ्यासक्रमाच्या सीईटी परीक्षांचे तसेच यानंतर या अभ्यासक्रमाचे फिल्ड टेस्टचे आयोजन महाराष्ट्र शासनाने केलेले असल्यामुळे सदर तारखांना कवयित्री बहिणाबाई चौधरी उत्तर महाराष्ट्र विद्यापीठाअंतर्गत संलग्नित महाविद्यालय मान्यताप्राप्त परिसंस्था तसेच विद्यापीठ प्रशाळा विभागातील अंतिम वर्ष अंतिम सत्राच्या विद्यार्थ्यांच्या (नियमित व बॅक लॉकसह) आयोजित केलेल्या कला-वाणिज्य, विज्ञान, अभियांत्रिकी, औषधनिर्माण शास्त्र, विधी, वास्तुशास्त्र व इतर सर्व अभ्यासक्रमांच्या परीक्षा विद्यार्थ्यांचे शैक्षणिक हित लक्षात घेता पुढे ढकलण्यात आल्या आहेत. परीक्षेचे नवीन वेळापत्रका नुसार आता या परीक्षा १,९,१०,११,१२ नोव्हेंबरला होणार आहेत.
