वॉशिंग्टन (वृत्तसंस्था) कोरोनाने बुधवारी एकाच दिवसात ३,२६३ रुग्णांचा बळी घेतल्यानंतर अमेरिकेचे प्रशासन खडबडून जागे झाले आहे. अमेरिकेच्या अन्न व औषध प्रशासनाच्या (एफडीए) सल्लागार समितीने अखेर फायजरच्या लस वापराला मंजुरी दिली आहे. आता अमेरिकेत आणीबाणीच्या काळात ‘फायझर-बायोएनटेक’ची लस वापरता येणार आहे.
कोरोनाने बुधवारी एकाच दिवसात ३,२६३ रुग्णांचा बळी घेतल्यानंतर अमेरिकेचे प्रशासन खडबडून जागे झाले आहे. आणीबाणीची परिस्थिती लक्षात घेता फायझर आणि बायोएनटेकच्या कोविड-१९ लशीच्या आणीबाणीच्या काळातील वापरासाठी मंजुरी देण्यात आली आहे. अमेरिकेने लसवापराच्या दिशेने महत्त्वाचे पाऊल टाकले आहे. अमेरिकेत करोनाच्या संसर्गामुळे तब्बल २ लाख ९२ हजार नागरिकांचा मृत्यू झाला आहे. तर, दोन दिवसांपूर्वी एका दिवसात तीन हजारांहून अधिक मृत्यू नोंदवले गेले. हा जगातील आत्तापर्यंतचा सर्वांत मोठा मृतांचा आकडा आहे. त्याच्या दुसऱ्याच दिवशी अमेरिकेच्या ‘एफडीए’च्या अंतर्गत येणाऱ्या लस व संबंधित जैविक उत्पादन सल्लागार समितीची बैठक झाली. आठ तासांच्या चर्चेनंतर अमेरिकी औषध कंपनी फायझर व जर्मन औषध कंपनी बायोएनटेक यांची संयुक्त निर्मिती असलेली लस आणीबाणीच्या स्थितीत वापरण्याची शिफारस ‘एफडीए’ला करण्याचा निर्णय मतदानाद्वारे घेण्यात आला. लशीच्या वापराच्या बाजूने १७ व विरोधात ४ मते पडली व एक सदस्य तटस्थ राहिला होता. त्यानंतर ‘एफडीए’ने या शिफारशी स्वीकारल्या असून आणीबाणीच्या काळात रुग्णाला ‘फायझर’ची लस दिली जाणार आहे.
