चाळीसगाव (प्रतिनिधी) तालुक्याचे सुपूर्त अप्पर पोलीस अधीक्षक तथा ट्रीपल महाराष्ट्र केसरी किताब पटकावलेल्या विजय नथ्थू चौधरी यांनी कॅनडा येथे झालेल्या वर्ल्ड पोलीस अँड फायर गेम्समध्ये कुस्ती स्पर्धेत मोठी कामगिरी फत्ते करत सुवर्णपदक पटकावले आहे. त्यांच्या ह्या यशाने भारतासह चाळीसगाव तालुक्याच्या नाव लौकीकात भर पडली आहे.
कॅनडा देशातील विनीपीग या शहरात पार पडलेल्या वर्ल्ड पोलीस अॅन्ड फायर गेममध्ये (हा खेळ पोलीस दलासाठी जागतीक ऑलम्पिक मानला जातो. १२५ किलो वजन गटात विजय चौधरी यांनी गेल्या वर्षीचा विजेता जेसी साहोताशी सामना केला. खेळ जिकंणाऱ्या साहोताशी अत्यंत अतीतटीच्या सामन्यात आपल्या देशी लूकच्या रांगडया गडीने साहोताचा ११-०८ या फरकाने पराभव केला. तर अंतिम सामन्यात त्याने अमेरीकेच्या जे हेलिंगरवर तब्बल दहा गुणांनी मोठी आघाडी घेत ११-०१ या फरकाने सूर्वणपदक पटकवले.
कॅनडात होणाऱ्या या खेळासाठी ते काही महिन्यांपासून पुण्यातील कात्रज येथील मामासाहेब मोहोळ कुस्ती संकुलनात कॅनडाच्या वेळेनुसार प्रशिक्षण घेत होते. त्यांना हिंदकेसरी रोहित पटेल यांनी मार्गदर्शन केले. विजय चौधरी हे सध्या पुणे विभागाच्या लाच लुचपत प्रतिबंधक विभागात अप्पर पोलिस अधीक्षक म्हणून कार्यरत आहे. चाळीसगाव तालुक्यातील सायगाव बगळी येथील हा रांगडा गडी तब्बल तीन वेळा महाराष्ट्र किताब आपल्याकडे ओढून आणण्यात यशस्वी झाल्याने त्यांना पोलीस खात्यात डीवायएसपी या पदाची नोकरी देण्यात आली होती.
विजय यांना पवन चौधरी, मोहन चौधरी, राजकुमार चौधरी, मनिषा चौधरी, मिराबाई चौधरी, स्वाती चौधरी असे सहा भाऊ बहिण आहेत. विजय हे चौथ्या क्रमांकाचे असून विजयने आत्तापर्यंत ग्रामीण भागातील स्थानिक पातळीपासून ते आंतराष्ट्रीय पातळीपर्यंत अनेक कुस्त्या खेळत त्या जिंकल्या सुध्दा आहे. विजयच्या यशाने संपूर्ण चाळीसगाव तालुक्याची मान गर्वाने उंच झाली आहे.
विजय चौधरी यांचा प्रवास !
विजय चौधरी यांचे बीए पर्यंत शिक्षण झाले असून त्यांनी २०१३ साली गोंदिया येथे झालेल्या महाराष्ट्र केसरी स्पर्धेत पायाला मार लागल्याने उप महाराष्ट्र केसरीचा किताब पटकाविला होता. २०१४ साली महाराष्ट्र केसरी, २०१५ साली दुसऱ्यांदा महाराष्ट्र केसरी, २०१६ साली तिसऱ्यांदा महाराष्ट्र केसरी किताब पटकाविला त्यानंतर त्यांची पुढे डीवासएपी म्हणून नियुक्ती झाली.
