गुवाहाटी (वृत्तसंस्था) शिवसेनेकडे 55 आमदार होते. आता आमची संख्या 50च्यावर झाली आहे. त्यामुळे 16 आमदार एकत्र येऊन एवढी मोठी संख्या ज्याच्यापाठी आहे, अशा नेत्याला गटनेतेपदावरून हटवू शकत नाही. शिंदे यांना गटनेतेपदावरून हटवण्याचा निर्णय चुकीचा असून त्याविरोधात आम्ही कोर्टात दाद मागणार आहोत, अशी माहिती शिंदे समर्थक आमदार दीपक केसरकर यांनी झूम अॅपद्वारे घेतलेल्या पत्रकार परिषदेत दिली.
दीपक केसरकर यांनी झूम अॅपवरून पत्रकार परिषद घेतली. यावेळी केसरकर म्हणाले की, आम्ही शिवसेना हायजॅक केली नाही. आम्ही शिवसेनेतच आहोत. आम्ही शिवसेनेविरोधात बंड पुकारलेले नाही. त्यामुळे आम्ही शिवसेना हायजॅक केली असं म्हणणं योग्य नाही. काँग्रेस आणि राष्ट्रवादीसोबत आघाडी नको अशी आमची मागणी होती. आम्ही सातत्याने पक्षप्रमुखांना सांगण्याचा प्रयत्न केला. पण त्यांनी ऐकलं नाही. आमचा गट स्थापन करण्याचा आम्हाला घटनात्मक अधिकार आहे. हा अधिकार आम्हाला मिळालाच पाहिजे. नाही तर आम्हाला कोर्टात जावेच लागेल, असंही केसरकर यांनी स्पष्ट केलं.
आमच्याकडे सर्वाधिक आमदार आहेत. त्यांच्याकडे आमदारांचं संख्याबळ कमी आहे. त्यामुळे शिंदे यांना गटनेतेपदावरून कुणीही हटवू शकत नाही. आमच्याकडे दोन तृतियांश बहुमत आहे. त्यामुळे गटनेते पदावर आमचा हक्क राहतो. तो नाकारल्यास आम्ही कोर्टात जाऊ, असं सांगतानाच आमदारांना नोटीस बजावली जात आहे. त्याला आम्ही कोर्टातच उत्तरे देऊ, असंही त्यांनी स्पष्ट केलं.
