छत्रपती संभाजीनगर (वृत्तसंस्था) गंगापूर तालुक्यातील वरखेड गावाजवळ नांदूर मधमेश्वर कालव्याच्या पाटात छोटा टेम्पो पडून एक जण ठार तर ३ वर्षीय मुलगी पाण्यात पडून वाहून बेपत्ता झाली. मंगळवार रोजी दपारी १ वाजेच्या सुमारास ही घटना घडली. यात वरखेड येथील सुधाकर अशोक वैराळ (वय २८ वर्षे ) यांचा मृत्यू झाला तर त्यांची मुलगी रिया वैराळ वय ३ वर्षे ही पाण्यात पडून बेपत्ता झाली आहे.
वरखेड (ता. गंगापूर जि छत्रपती संभाजीनगर ) येथील सुधाकर अशोक वैराळ हे मंगळवार रोजी दुपारी १ वाजेच्या सुमारास आपल्या छोटा हत्ती क्रमांक (एम एच २० इजी ०९६६) मध्ये बसून आपल्या मुलीसह घरी जात असताना वरखेड गावाजवळील त्यांचा छोटा हत्ती अचानक नांदूर मधमेश्वरच्या प्रमुख पाटातील पाण्यात पडला. सध्यस्थितीत या पाटात मुबलक वाहते पाणी आहे. या पाण्यात छोटा हत्ती पडून तीन वर्षीय रिया वाहून गेली. तर सुधाकर वैराळ गंभीर जखमी झाले. उपस्थित ग्रामस्थांनी जेसीबीच्या सहाय्याने टेम्पो पाण्याबाहेर काढला.
जखमी वैराळ यांना मोरया रुग्णवाहिकेमधून चालक सागर शेजवळ, आकाश आमराव, अजय जाधव उपचारासाठी गंगापूर येथील उपजिल्हा रुग्णालयात हलविले. मात्र या ठिकाणी डॉक्टरानी सुधाकर अशोक वैराळ यास तपासून मृत घोषित केले. पोलिसांनी घटनास्थळी धाव घेवून घटनेचा पंचनामा केला. अशोक वैराळ यांच्या पश्चात पत्नी एक मुलगा दोन मुली असून यातील एक मुलगी केवळ १२ दिवसाची आहे. त्यांच्या जाण्याने वैराळ कुटुंबियांवर दुःखाचा डोंगर कोसळला. मृतदेह बघून नातेवाईकांनी काळीज चिरणारा आक्रोश केला होता.
