धरणगाव (प्रतिनिधी) धरणगावहून चोपडा येथे जाण्यासाठी बसमध्ये बसलेल्या एका महिलेची १८ हजार रुपये किंमत असलेल्या तीन तोळ्याची सोन्याची पोत अज्ञात चोरट्याने लांबवल्याची घटना उघडकीस आली आहे. या प्रकरणी धरणगाव पोलिसात गुन्हा दाखल करण्यात आला आहे.
या संदर्भात अधिक असे की, दि. १४ रोजी दुपारी चार वाजेच्या सुमारास शकुंतला माणिकराव बोरसे (वय ७० वर्ष, धंदा गृहिणी रा. फुले नगर नागलवाडी रोड चोपडा) या धरणगाव येथून चोपडा जाण्यासाठी जळगाव-शहादा बसमध्ये बसलेल्या होत्या. रोटवद गावाजवळ आल्यानंतर त्यांच्या लक्षात आले की, बस स्थानकात बसमध्ये चढताना कुणीतरी गर्दीचा फायदा घेत गळ्यातील १८ हजार रुपये किंमत असलेली ३ तोळ्याची सोन्याची पोत चोरली आहे. यानंतर शकुंतला बोरसे तात्काळ धरणगाव पोलीस स्थानकात धाव घेतली. या प्रकरणी धरणगाव पोलिसात गुन्हा दाखल करण्यात आला असून पुढील तपास स.फौ. करीम सैय्यद करीत आहेत.
