सातारा (वृत्तसंस्था) येथील बसस्थानकावर शनिवारी दुपारी दीडच्या सुमारास एसटी बसच्या चाकाखाली १३ वर्षीय विद्यार्थीनी चिरडल्याने जागीच ठार झाली. श्रावनी विकास आयवळे (रा सुलतानपूर ता. वाई), असे मयत बालिकेचे नाव असून ती त.ल. जोशी विद्यालयाची विद्यार्थिनी होती.
याबाबत अधिक असे की, शनिवारी दुपारी दीडच्या सुमारास शालेय विद्यार्थ्यांची घरी जाण्यासाठी बसस्थानकावर एकच गर्दी झाली होती. वाई- बालेघर एसटी. गाडी क्र (एमएच १४ बीटी ०४९६) ही गाडी बसस्थानकावर फलाटाला लागत असताना गाडीमध्ये शिरण्यासाठी विद्यार्थ्यांनी एकच गर्दी केली होती. यावेळी श्रावणी आयवळे ही विध्यार्थीनी गाडीच्या मागच्या बाजूस पडली. गाडी मागे येत असल्याने तिचे डोके गाडीच्या चाकाखाली चिरडले. त्यामुळे ती जागेवरच मृत झाली.
यामुळे बसस्थानकात खळबळ उडाली. फलाटावर एसटी लागलेली असताना गाडीत बसण्यासाठी गर्दी झाल्यामुळे श्रावणीचा मृत्यू झाल्याचे समजल्याने विद्यार्थ्यांची मोठी गर्दी झाली होती. या घटनेची माहिती मिळताच पर्यवेक्षधीन पोलीस सहाय्यक अधीक्षक कमलेश मीना, पोलीस निरीक्षक बाळासाहेब भरणे, कृष्णकांत पवार व सहकारी घटनास्थळी दाखल झाले. त्यांनी पंचनामा करून मृतदेह शवविच्छेदनासाठी पाठवला. यावेळी झालेली गर्दी पोलिसांनी बघ्यांची गर्दी हटवली. याप्रकरणी पोलिसांनी वाहन चालक जीवन मारुती भोसले (रा. नांदवळ वय ३६) याला ताब्यात घेतले आहे.
