मुंबई (वृत्तसंस्था) देवेंद्र फडणवीस समर्थकांनी अमित शहा यांचा फोटो बॅनरवरून का हटवला?, या प्रश्नावर सदाभाऊ खोत यांनी कोणतेही उत्तर न देता आज पळ काढल्याचे बघावयास मिळाले.
एकनाथ शिंदे सरकार स्थापन झाल्यानंतर खातेवाटपाबाबत रस्सीखेच सुरू आहे. रयत क्रांती संघटनेचे नेते सदाभाऊ खोत आज भाजपच्या नेत्यांच्या भेटीला पोहोचले यावेळी खोत यांनी शिवसेनेचे खासदार संजय राऊत यांच्यावर टीका केली. संजय राऊत हे दुधात मिठाचा खडा आहे. एसटी कर्मचाऱ्यांनी आत्महत्या केल्या त्याच्यावर मात्र त्यांना कधी बोलावसं वाटलं नाही. राज्यातला शेतकरी आत्महत्या करत होता त्याच्यावर ते बोलले नाहीत आपण बोलून बोलून आपलं राज्य घडवलं आता थोडं शांत बसावं, असा सल्लावजा टोला खोत यांनी सेनेला लगावला. तसेच देवेंद्र फडणवीस हे लोकमान्य नेते आहेत आणि त्यांनी दाखवून दिलेला आहे की, त्याग कशाला म्हटला जातो आणि एक मोठ्या मनाचे व्यक्तिमत्व या राज्याला मिळाला आहे.
दरम्यान, देवेंद्र फडणवीस हे मुख्यमंत्रिपदाचे दावेदार असताना उपमुख्यमंत्रिपद दिल्यामुळे भाजपच्या गोटात कमालीची नाराजी पसरली आहे. त्यामुळे मुंबई पासून तर नागपूरपर्यंतच्या पोस्टरवरून अमित शहा यांचा फोटो गायब आहे. साधारणपणे राज्य पातळीवरील कोणत्याही नेत्याच्या शुभेच्छा फलकावर पंतप्रधान नरेंद्र मोदी, केंद्रीय गृहमंत्री अमित शाह, भाजपा अध्यक्ष जे. पी. नड्डा याचे फोटो पाहायला मिळतात. मात्र, महाराष्ट्रात नव्या सरकारच्या स्थापनेनंतर मुंबईपासून नागपूरपर्यंत फडणवीसांच्या शुभेच्छा पोस्टरवरून अमित शाहांचा फोटो गायब झाला आहे.
