जालना : वडिलोपार्जित जमिनीचे वाटणीपत्र करून देण्यासाठी १२ हजार रुपयांची लाच स्वीकारणाऱ्या चांदई एक्को सज्जाच्या महिला तलाठ्यास लाचलुचपत प्रतिबंधक विभागाने रंगेहाथ पकडले. गुरुवारी (दि.२५) राजूर येथे ही कारवाई करण्यात आली. कल्पना पंजाबराव काळमेघ (वय ३५, रा. शिवाजीनगर, देऊळगावराजा) असे लाच स्वीकारणाऱ्या महिला तलाठ्याचे नाव आहे.
या प्रकरणातील तक्रारदार यांची चांदई एक्को शिवारात गट क्रमांक २१५ मध्ये १ हेक्टर ५० आर वडिलोपार्जित जमीन आहे. सदर जमीन वाटणीपत्रानुसार तक्रारदार व त्यांच्या आईच्या नावाने करायची असल्याने त्यांनी तलाठी कल्पना काळमेघ यांच्याकडे अर्ज केला होता. या कामासाठी तलाठी कल्पना काळमेघ यांनी २० हजार रुपयांची लाच मागितली. तडजोडीअंती १२ हजार रुपये घेण्याचे कबूल केले. मात्र, तक्रारदाराची लाच देण्याची इच्छा नसल्याने त्यांनी लाचलुचपत प्रतिबंधक विभागाकडे रितसर तक्रार केली.
या तक्रारीच्या आधारे लाचलुचपत प्रतिबंधक विभागाने लाचेच्या मागणीची पडताळणी करून आज राजूर येथे सापळा लावला. तलाठी कल्पना काळमेघ यांना तक्रारदारांकडून १२ हजार रुपयांची लाच स्वीकारताना रंगेहाथ पकडले. या प्रकरणी हसनाबाद पोलीस ठाण्यात लाचलुचपत प्रतिबंधक कायद्यानुसार गुन्हा दाखल करण्यात आला आहे.
लाचलुचपत प्रतिबंधक विभागाचे उपअधीक्षक किरण बिडवे, पोलीस निरीक्षक सुजित बडे, अंमलदार गजानन घायवट, गणेश चेके, गणेश
बुजाडे यांनी ही कारवाई केली.