जळगाव (प्रतिनिधी) तालुक्यातील वावडदा येथील उपसरपंच कमलाकर आत्माराम पाटील ( वय ४५) यांचा उष्माघात सदृश्य लक्षणांनी शनिवारी सकाळी मृत्यू झाला आहे. शुक्रवारी दिवसभर उन्हामध्ये शेतात मका काढण्याचे काम केल्यानंतर घरी आल्यावर त्यांची प्रकृती खराब झाली होती.
वावडदा परिसरात बिबट्याचा वावर आहे. परिसरात बिबट्याची भीती पसरलेली असल्यामुळे शेतात काम करण्यासाठी मजूर मिळत नाहीय. त्यामुळे कमलाकर पाटील यांना स्वतः शेतात मका काढण्यासाठी जावे लागले. त्यांनी शुक्रवारी दिवसभर उन्हामध्ये शेतात मका काढण्याचे काम केले. त्यानंतर मध्यरात्री त्यांना शौच व उलट्यांचा त्रास होऊ लागला. त्यांनी घरगुती उपचार केले. मात्र, तरीही सुधारणा न झाल्याने त्यांना शहरातील खासगी रुग्णालयात दाखल करण्यात आले. तेथे त्यांचा मृत्यू झाला.
कमलाकर पाटील हे वावडदा माध्यमिक विद्यालयाचे चेअरमनही होते. त्यांच्या पश्चात पत्नी, आई, मुले व भाऊ असा परिवार आहे. दरम्यान, याच गावातील उखई विक्रम जाधव (वय ३५) या तरुणाचा शुक्रवारी मृत्यू झाला होता. सलग दुसऱ्या दिवशी अशी दुर्दैवी घटना घडल्याने शनिवारी गावातील व्यवहार व बाजारपेठ बंद ठेवण्यात आली होती.
