नवी दिल्ली (वृत्तसंस्था) देशभरातील कोरोना (corona) रुग्णांची संख्या या आठवड्याच्या सुरुवातीपासून मोठ्या प्रमाणात वाढू लागली आहे. शनिवारी देशात २७ हजार रुग्ण सापडले होते, त्यानंतर रविवारी देशात तब्बल ३३ हजार ७५० आढळले आहे. जवळपास १०७ दिवसानंतर ही सर्वाधिक रुग्णसंख्या आहे.
२ जानेवारीपर्यंतच्या आठवड्यात दिवसाला सरासरी १८ हजार कोरोनाचे रुग्ण आढळले. १२ ऑक्टोबरनंतर आठवड्याच्या सात दिवसांच्या सरासरीत ही संख्या पहिल्यांदाच जास्त आहे. २६ डिसेंबरला ६ हजार ५३१ जणांना देशात कोरोनाची लागण झाली होती. त्यानंतर आज हीच संख्या पाचपट झाली असून ३३ हजारांच्यावर कोरोना रुग्ण आढळले आहेत.
भारतात रविवारी कोरोनाचे ३३ हजार ७५० रुग्ण आढळले. तर दिवसभरात १० हजार ८४६ जण कोरोनामुक्त झाले. दिलासा देणारी बाब म्हणजे मृत्यूची संख्या शनिवारच्या तुलनेत कमी आहे. गेल्या २४ तासात १२३ जणांचा मृत्यू झाला आहे. सध्या देशात १ लाख ४५ हजार ५८२ सक्रीय रुग्ण आहेत. तर ३ कोटी ४२ लाख ९५ हजार ४०७ जणांनी कोरोनावर मात केली आहे. आतापर्यंत कोरोनामुळे भारतात ४ लाख ८१ हजार ८९३ जणांनी प्राण गमवावे लागले आहेत.
आठवड्यात रुग्णसंख्या पाचपट
अडीच महिन्यानंतर कोरोना रुग्णांच्या संख्येत इतकी मोठी वाढ झाली आहे. ज्या वेगाने कोरोना रुग्णांची संख्या वाढतेय ते चिंताजनक आहे. २५ डिसेंबरच्या आठवड्यात सात दिवस सरासरी ६ हजार ६४१ कोरोना रुग्ण आढळत होते. तर यानंतर एका आठवड्यात संसर्गात मोठी वाढ झाली. रविवारी ३० हजारांहून अधिक रुग्ण आढळले आहेत. म्हणजेत जवळपास गेल्या आठवड्याच्या तुलनेत या आठवड्यात पाचपट अधिक रुग्ण एका दिवसात सापडले आहेत. कोरोना रुग्णांची संख्या अशीच वाढत राहिली तर येत्या आठवड्यात कोरोना रुग्णांची संख्या आणखी वाढण्याची भीतीही व्यक्त केली जात आहे.
ओमिक्रॉनच्या रुग्णांची संख्या वाढली
देशात ओमिक्रॉनच्या रुग्णांची संख्याही वाढत आहे. देशात ओमिक्रॉनच्या एकूण रुग्णांची संख्या १७०० पर्यंत गेली आहे. सर्वाधिक ५१० रुग्णांची नोंद महाराष्ट्रात झाली आहे. यातील १९३ रुग्ण बरे झाले आहे. यानंतर दिल्लीत ३५१ रुग्ण आढळलेत. ५७ रुग्ण बरे झाले आहेत. दिल्लीनंतर केरळमध्ये १५६, गुजरातमध्ये १३६, तामिळनाडूत १२१, राजस्थानमध्ये १२० अशा एकूण २३ राज्यांमध्ये ओमिक्रॉन पसरला आहे. देशातील १७०० रुग्णांपैकी ६३९ रुग्ण बरे झाले आहेत.
