पुणे (वृत्तसंस्था) तरुणाला आपल्या पत्नीच्या चारित्र्याचा संशय आला होता. त्यामुळे तिचा पाठलाग केला आणि ५० वर्षाच्या पुरुषाबरोबर २१ वर्षाची पत्नीला पाहिले. त्याने दोघांना रंगेहाथ पकडून जाब विचारल्यावर दोघांनी मिळून या तरुणाला बेदम मारहाण करुन जखमी केले. याप्रकरणी कोंढवा पोलिसांनी दोघांवर गुन्हा दाखल केला आहे.
ही घटना कोंढव्यातील बिस्मिला हॉलजवळील कम्युनिटी सोसायटीसमोर मंगळवारी साडेचार वाजता घडली. याप्रकरणी कोंढव्यात राहणार्या ३१ वर्षाच्या तरुणाने कोंढवा पोलीस ठाण्यात फिर्याद दिली आहे. त्यावरुन पोलिसांनी ५० वर्षाची व्यक्ती व फिर्यादीच्या पत्नीविरोधात गुन्हा दाखल केला आहे. याबाबत पोलिसांनी दिलेल्या माहितीनुसार, फिर्यादीला त्याच्या पत्नीवर संशय होता. फिर्यादी यांची पत्नी घरातून बाहेर पडल्यावर तो तिचा पाठलाग करुन लागला. पत्नी एका व्यक्तीबरोबर जात होती. त्याने या दोघांना बिस्मिला हॉल कम्युनिटी सोसायटीच्या समोर अडवले. पत्नी व त्या व्यक्तीला तुम्ही दोघे कुठे जाता, असे विचारले. याचा राग येऊन पत्नीने फिर्यादीला हाताने मारहाण करण्यास सुरुवात केली. तिच्याबरोबरील व्यक्तीने दगडाने मारहाण करुन जखमी केले. कोंढवा पोलिसांनी दोघांवर गुन्हा दाखल केला आहे. पुढील कोंढवा पोलीस तपास करीत आहेत.
