जळगाव ( प्रतिनिधी ) – बँक खाते अद्ययावत करण्याच्या नावाखाली बनावट लिंक पाठवून नागरिकांची आर्थिक फसवणूक करण्याचे प्रकार वाढत आहेत. शहरातील ओम नगर परिसरातील विजय धर्मराज चव्हाण (वय ३५) या तरुणाला बनावट ‘एसबीआय योनो’ लोगो असलेल्या फाईलद्वारे ५ लाख ४० हजार ४३९ रुपयात गंडविले. हा प्रकार उघडकीस आल्यानंतर तरुणाने सायबर पोलीस ठाण्यात तक्रार दिली. त्यानुसार ऑनलाईन ठगाविरुद्ध पोलीस ठाण्यात गुन्हा दाखल करण्यात आला आहे.
शहरातील जूना खेडी रोड परिसरातील ओम नगरात विजय धर्मराज चव्हाण (वय ३५) हा तरुण वास्तव्यास आहे. त्यांना दि. १७ जानेवारी रोजी एका अनोळखी व्यक्तीने ‘आधार केवायसी अपडेट’ नावाची एक संशयास्पद फाईल पाठवली होती. ही फाईल इन्स्टॉल करताच, त्या सॉफ्टवेअरने विजय यांच्या संमतीशिवाय त्यांच्या मोबाईलचा पूर्णपणे ताबा मिळवला. मोबाईलचा ताबा मिळवल्यानंतर सायबर चोरट्याने विजय यांच्या बँक खात्याची सर्व गोपनीय माहिती प्राप्त केली. चोरट्याने केवळ खात्यातील शिल्लक रक्कमच चोरली नाही, तर त्या खात्याशी संबंधित असलेली एफडी देखील परस्पर मोडून सर्व रक्कम दुसऱ्या खात्यात वळवली. एकूण ५ लाख ४० हजार ४३९ रुपयांमध्ये आपली ऑनलाईन फसवणूक झाल्याचे लक्षात येताच विजय चव्हाण यांनी सायबर पोलीस ठाणे गाठले. त्यांच्या तक्रारीवरून दि. २१ जानेवारी रोजी सकाळी अज्ञात आरोपीविरुद्ध गुन्हा दाखल केला. सायबर पोलीस ठाण्याचे पोलीस निरीक्षक सतिष गोराडे या प्रकरणाचा पुढील तपास करत आहेत.
