जळगाव (प्रतिनिधी) भांडण सोडविण्यासाठी गेलेल्या तरुणाचा चाकूने भोसकून खून केल्याची घटना घडली होती. याप्रकरणी १४ जणांची साक्ष महत्वपूर्ण ठरल्यानंतर जिल्हा सत्र न्यायालयाने खून करणार्‍या संशयीत आरोपीला जन्मठेपेची शिक्षा सुनावली आहे. कल्लूसिंग शंकरसिंग राजपूत असे जन्मठेपेची शिक्षा सुनावलेल्या आरोपीचे नाव आहे.
यासंदर्भात अधिक असे की, मध्यप्रदेशातील खंडवा जिल्ह्यातील हरसूद तालुक्यातील कुंडिया येथील मूळ रहिवासी आसाराम छोटेलाल पवार (वय-३०) हे मेहरुण परिसरातील मंगलपूर भागात वास्तव्यास होते. दि. ६ फेब्रुवारी २०११ रोजी सुरेश बंजारा यांचे काही लोकांशी भांडण सुरु असल्याने आसाराम पवार याने त्यांचे भांडण सोडवासोडव केली. यामध्ये सुरेश यांचे जावाई कल्लूसिंग शंकरसिंग राजपूत (वय-२५ मूळ रा. तेहासी ता. खागा जि. फतेहपूर उत्तर प्रदेश ह. मू. शांती नारायण नगर मेहरुण) याने त्याच्या हातातील चाकू आसाराम याच्या छातीत मारुन गंभीर जखमी केले आणि त्याठिकाणाहून पळून गेला होता. दरम्यान, आसाराम याचा भाऊ दिनेशराव याने जखमी आसाराम याला शासकीय वैद्यकीय रुग्णालयात दाखल केले. याठिकाणी त्यांच्यावर उपचार सुरु असतांना त्याचा मृत्यू झाला होता. याप्रकरणी एमआयडीसी पोलिस ठाण्यात संशयित आरोपी कल्लूसिंग राजपूत व जितेंद्रसिंग राजपूत यांच्याविरुद्ध गुन्हा दाखल करण्यात आला होता. त्यानंतर दि. ८ रोजी त्या दोघांना अटक करण्यात आली होती.
मयताचा उपचारादरम्यान मृत्यू झाल्याने दाखल झालेल्या गुन्ह्यात खूनाचा कलम वाढविण्यात आले होते. त्यानंतर हा खटला प्रमुख जिल्हा व सत्र न्यायाधीश एस. डी. जगमलानी यांच्या न्यायालयात सुरु होता. खटला सुरु असतांना तपासधिकारी पोलीस उपनिरीक्षक बी. ए. कदम यांनी न्यायालयात दोषारोप पत्र दाखल केले. खटला न्यायालयात सुरु असतांना सरकारपक्षाकडून याप्रकरणी १४ साक्षीदार तपासण्यात आले. यामध्ये मयत आसाराम याची पत्नी, भाऊ, संशयीत आरोपीची सासू, सासरे व मृत्यूपूर्वी जवाबनोंदविणारे कार्यकारी दंडाधिकारी पुरुषोत्तम खैरनार, डॉ. किरण पाटील, डॉ. उमेश वानखेडे व तपासधिकारी पोलीस उपनिरीक्षक बी. ए. कदम यांच्या साक्ष महत्वपूर्ण ठरल्या.
न्यायालयाने १४ जणांची साक्ष महत्वपूर्ण ठरवित न्यायालयासमोर सादर केलेल्या पुरव्यांच्या आधारावर न्यायालयाने संशयीत आरोपी कल्लूसिंग राजपूत याला खून केल्याप्रकरणी जन्मठेप व ५ हजार रुपये दंड न भरल्यास ३ महिने साधीकैदेची शिक्षा सुनावली. तसेच दुसर्‍या संशयीत आरोपीस जितेंद्रसिंग राजपूत याला निर्दोष मुक्त करण्यात आले. या खटल्यात सहाय्य सरकारी वकील प्रदीप एम. महाजन यांनी प्रभारी युक्तीवाद केला. याकामी पैरवी अधिकारी म्हणून राजेंद्र सैंदाणे यांनी कामकाज पाहिले.
