धरणगाव (प्रतिनिधी) क्रांतिकारी खाज्याजी नाईक संस्था संचलित अनुदानित आश्रम शाळा, धरणगाव येथे दिनांक १९ जुलै रोजी मौखिक आरोग्य जागरूकता व तपासणी शिबिराचे आयोजन करण्यात आले. जिल्हा शल्य चिकित्सक डॉ. किरण पाटील व धरणगाव ग्रामीण रुग्णालयाचे वैद्यकीय अधीक्षक डॉ. मनोज पाटील यांच्या मार्गदर्शनाखाली हे शिबिर घेण्यात आले.
शिबिरात धरणगाव येथील दंतरोग तज्ञ डॉ. मयूर जैन व दंत सहाय्यक श्री. प्रविण पाटील यांनी विद्यार्थ्यांना दातांची निगा कशी राखावी, तोंडाचे आरोग्य चांगले राखण्यासाठी आहार-विहार कसा असावा याबाबत सखोल मार्गदर्शन केले. तसेच तंबाखू, गुटखा, सिगरेट यांसारख्या व्यसनांचे आरोग्यावर होणारे गंभीर दुष्परिणाम स्पष्ट करून विद्यार्थ्यांना हे व्यसन आयुष्यभर न करण्याची प्रतिज्ञा देण्यात आली.
तपासणी दरम्यान दात व तोंडाच्या समस्या असलेल्या ३० ते ३५ विद्यार्थ्यांची तपासणी करून त्यांना आवश्यक औषधे वितरित करण्यात आली. यावेळी उपस्थित विद्यार्थ्यांना टूथपेस्ट व ब्रश भेट देऊन योग्य प्रकारे दातांची निगा राखण्याचे प्रात्यक्षिक देखील डॉक्टरांकडून दाखवण्यात आले. दर तीन महिन्यांनी असे शिबिर घेण्याचे आश्वासन डॉक्टरांनी यावेळी दिले.
कार्यक्रमाचे प्रास्ताविक गायकवाड सर यांनी केले तर सूत्रसंचालन वाघ सर यांनी केले. संस्थेकडून अमोल जाधव सर यांनी डॉ. मयूर जैन यांचा सत्कार केला. या कार्यक्रमाला प्रतीक जैन, मनोज रायपूरकर, सचिन भावसार, ज्येष्ठ मार्गदर्शक शिक्षक आ. दगडू आबा सूर्यवंशी सर, सौ. सुवर्णा महाजन मॅडम, तसेच शिक्षक व शिक्षकेतर कर्मचारी यांची उपस्थिती लाभली.
संस्थेचे अध्यक्ष भाईदास सोनवणे, सचिव विलास महाजन, सहसचिव समाधान भाऊ मोरे, कोषाध्यक्ष वाय. पी. पाटील, संचालक किशोर चौधरी व सर्व पदाधिकाऱ्यांनी डॉ. मयूर जैन व त्यांच्या टीमचे आभार मानून अभिनंदन केले. विद्यार्थ्यांच्या आरोग्याच्या दृष्टीने राबविण्यात आलेला हा उपक्रम विशेष उपयुक्त ठरल्याची प्रतिक्रिया पालक व शिक्षक वर्गाकडून व्यक्त करण्यात आली.
