नंदुरबार (प्रतिनिधी) राज्याचे उपमुख्यमंत्री अजित पवार यांचे चिरंजीव पार्थ पवार यांचे निकटवर्तीयाचा समजला मल्ट्रीट्रेड एलएलपी या साखर कारखान्यावर आयकर विभागाने धाड टाकल्यामुळे प्रचंड खळबळ उडाली आहे. दरम्यान, कारखान्याची मालमत्ता ही १५० हुन अधिक कोटींची असतांना फक्त ४७ कोटीत हा कारखाना विक्री करण्यात आल्याचा आरोप देखील होत आहे. कारखाना खरेदीसाठी त्या वेळेस पुणे मद्यवर्ती बँकेने कोट्यवधीचे कर्ज दिले होते.
राज्यभरात सुरू असलेल्या सहकारी साखर कारखान्याबरोबरच नंदुरबार जिल्ह्यातील समशेरपूर येथे स्थित आयान मल्टीट्रेड एलएलपी साखर कारखान्यावर आज सकाळपासूनच आयकर विभागाच्या अधिकाऱ्यांनी झाडाझडती घ्यायला सुरुवात केली आहे. कारखान्याच्या गेटच्या आतमध्ये जाण्यास कोणालाही परवानगी दिली जात नाहीय. त्यामुळे नेमकी काय कारवाई सुरू आहे, हे अद्याप स्पष्ट होऊ शकलेले नाही. सदर साखर कारखान्याचे मालक सचिन शिंगारे असून ते राज्याचे उपमुख्यमंत्री अजित पवार यांचे चिरंजीव पार्थ पवार यांचे निकटवर्तीय असल्याचे बोलले जात आहे. सदर कारखाना १५० कोटी रुपयांची मालमत्ता असल्याची माहिती आहे. मात्र याची तपासणीचे काम पुर्ण झाल्यानंतरच तपासणीचे कारण समजू शकेल.
