भुसावळ (प्रतिनिधी) येथील रजा टॉवर परिसरातील हॉटेल आणि किराणा दुकान अज्ञात चोरट्यांनी फोडल्याचा प्रकार आज सकाळी उघडकीस आला आहे. चोरट्यांनी साधारण दहा हजाराचा ऐवज लंपास केल्याची प्राथमिक माहिती आहे.
रजा टॉवर परिसरात अब्दुल वसीम अब्दुल नबी यांचे अलिजा नावाचे कोल्ड्रिंग वजा किराणा दुकान आहे. तर शेख वसीम शेख इस्माईल यांचे हॉटेल मीरान आहे. या दोघांनी बाजारपेठ पोलिस स्थानकात दिलेल्या तक्रारी अर्जात म्हटले आहे की, अज्ञात चोरट्यांनी शनिवारी मध्यरात्री दुकानाचे कुलूप लोखंडी रॉडने तोडून आत प्रवेश केला. त्यानंतर दुकानातून विविध वस्तू व रोख रकमेची चोरी केली आहे. त्यात अलिजा कोल्ड्रिंगमधून चोरट्यांनी गोल्डफ्लेक सिगरेट १४ , मोठी गोल्डफ्लेक ८, कोवो मिक्स ७, ओन्ली ओन्ली ६, आईस बर्क ४, गरम सिगरेट १२ पाकीट, दीड हजार रुपयांची चिल्लर तर ६०० रुपयाच्या १० च्या नोटा चोरून नेले. तर हॉटेल मीरानमधून गॅस सिलेंडर आणि एक हजाराची रोकड लंपास केली. दोन्ही दुकानातून साधारण १० हजार रुपयाचा ऐवज चोरीला गेला आहे. याबाबत बाजार पेठ पोलीस स्थानकात अद्याप गुन्हा दाखल होण्याची प्रक्रिया सुरु आहे.
