जळगाव (प्रतिनिधी) दी महाराष्ट्र राज्य सहकारी बँक असोसिएशनच्या संचालक मंडळ निवडणुकीत जळगाव जिल्हा सहकारी बँकेचे चेअरमन गुलाबराव देवकर यांची नाशिक विभागातून बिनविरोध निवड झाली. यानिमित्त राष्ट्रवादीच्या नेत्यांतर्फे देवकर यांचा सत्कार करण्यात आला.
राष्ट्रवादी काँग्रेसचे नेते, विधानसभेचे माजी अध्यक्ष अरुणभाई गुजराथी, माजी खासदार वसंतराव मोरे, माजी आमदार दिलीप वाघ, राष्ट्रवादी सहकार विभागाचे जिल्हाध्यक्ष वाल्मीक पाटील, संजय गरूड आदींनी गुलाबराव देवकर यांचा सत्कार केला.
राज्य सहकारी बँक असोसिएशनच्या संचालक मंडळासाठी २१पैकी १० संचालक बिनविरोध निवडून आले आहेत. उर्वरित जागांसाठी २२ नोव्हेंबरला मतदान, तर २३ नोव्हेंबरला मतमोजणी होणार आहे.
जिल्हा मध्यवर्ती सहकारी बँक मतदारसंघातून नाशिक विभागाकडून जळगाव जिल्हा बँकेचे चेअरमन गुलाबराव देवकर यांची बिनविरोध निवड झाली आहे. मुंबई कोकण विभागातून सिद्धार्थ कांबळे, दिगंबर दुर्गाडे, औरंगाबाद विभागातून अर्जुनराव गाडे, अमरावती विभागातून वसंत घुईखेडकर बिनविरोध निवडून आले आहेत.
