धरणगाव (प्रतिनिधी) घंटागाड्या घरोघरी जाऊन नियोजनबद्ध रीतीने कचरा संकलन करून कचऱ्याचे वर्गीकरण करणे आणि उघड्यावर कचरा टाकण्यास (प्रामुख्याने वस्तीच्या जवळ) मनाई असतानाही पालिकेचा ठेकेदार चक्क डंपिंग ग्राऊंडला लागून असलेल्या रस्त्याच्या कडेला कचरा फेकत असल्याची धक्कादायक गोष्ट उघडकीस आली आहे.
धरणगाव-गारखेडे रस्त्यावर डंपिंग ग्राऊंड आहे. शहरातून घरोघरी जाऊन नियोजनबद्ध रीतीने कचरा संकलन करून कचऱ्याचे वर्गीकरण करून डंपिंग ग्राऊंडमध्ये टाकण्याऐवजी रत्याच्या कडेलाच कचरा टाकला जात असल्यामुळे नागरिकांच्या आरोग्याचा प्रश्न निर्माण झाला आहे. या रस्त्याने आनोरे-धानोरे, गारखेडे या गावातील नागरिक,विद्यार्थी, व्यापारी वर्ग ये-जा करत असतो. दुर्गंधीमुळे श्वासनांचे विकार होण्याचा धोका वाढला आहे.
विशेष म्हणजे कोरोनाच्या काळात मोठ्या प्रमाणात काळजी घेण्याची गरज असतांना ठेकादाराकडून मनमानी कारभार सुरु असल्याचा आरोप होत आहे. धरणगाव पालिकेने अमळनेर येथील आदर्श कंपनीला शहरातील कचरा संकलनाचा ठेका दिला आहे. शहरातील साधारण ८ हजार घरामागे ठेकेदारास ५१.५० रुपया प्रमाणे हा ठेका देण्यात आला आहे. त्यानुसार वर्षाला लाखो रुपये ठेकेदारास दिले जातात. परंतू ठेकेदाराकडून सर्रास नियमांचे उल्लंघन होत असल्याचा आरोप होत आहे. दरम्यान, धरणगाव सारख्या मोठ्या शहरात आजच्या घडीला अवघ्या ४ घंटा गाड्या आणि एक ट्रॅक्टर सुरु असल्याचे कळते.
