जळगाव (प्रतिनिधी) काही दिवसांपूर्वी एका महिलेच्या नावाने जळगाव जिल्हा विशेष शाखेच्या (डीएसबी) अधिकारी कर्मचाऱ्यांना अश्लील मॅसेज पाठविल्याप्रकरणी पोलीस मुख्यालयातील पोलीस हेड कॉन्स्टेबल नरेंद्र लोटन पाटील (वारुळे) याला अटक करण्यात आली होती. दरम्यान, आज या पोलिसाचा १५ हजाराच्या वैयक्तीक जात मुचलक्यावर जामीन मंजूर करण्यात आला आहे. संशयिताकडून अॅड. विजय पाटील आणि अॅड.कुणाल पवार यांनी कामकाज पहिले.
यासंदर्भात अधिक असे की, ज्या पोलिसांना अश्लील मॅसेज गेले, त्यात एका महिला पोलीस कर्मचाऱ्याचाही क्रमांक होता. याच महिला पोलीस कर्मचाऱ्याच्या फिर्यादीवरून सायबर ठाण्यात गुन्हा दाखल झाला होता. धरणगाव, अमळनेर व नाशिक येथे दाखल गुन्ह्यांमध्ये देखील वारुळे यांचा सहभाग असल्याचा संशय पोलिसांना आहे. दरम्यान, पोलीस दलातील अंतर्गत वादातून वारुळे यांना या प्रकरणात गोवले जात असल्याचा युक्तिवाद त्यांचे वकील कुणाल पवार यांनी मागील तारखेला न्यायालयाला केला होता. तर आज अॅड. विजय पाटील यांनी युक्तिवाद केला की, गुन्हे उकल करण्याच्या स्पर्धेतून पोलीस दलातीलच काही लोकांनी वारुळे यांना या गुन्ह्यात गोवले आहे. तसेच वारुळे यांनी पोलीस दलात मोठी सेवा बजावली आहे. त्यामुळे ते तपासात अडथळा निर्माण होईल, असे कोणतेही कृत्य करणार नाहीत. त्यामुळे त्यांना जामीन देण्यात यावा. दरम्यान, यानंतर कोर्टाने वारुळे यांना पोलिसाचा १५ हजाराच्या वैयक्तीक जात मुचलक्यावर जामीन मंजूर केला. मुख्य न्याय दंडाधिकारी यांच्या कोर्टात संशयित आरोपीतर्फे अँड. कुणाल पवार आणि अँड विजय पाटील यांनी कामकाज पहिले तर अँड.राजेश काब्रा यांनी सहकार्य केले. सरकार पक्षाकडून अँड.रंजना पाटील यांनी कामकाज पहिले.
