भुसावळ (प्रतिनिधी) जिल्ह्यातील महसूल विभागात प्रचंड खळबळ उडवणारी बातमी समोर आली आहे. सात लाखांच्या धान्याच्या अपहारप्रकरणी भुसावळचे तत्कालीन प्रांताधिकारी तसेच चार तहसीलदार व गोदाम व्यवस्थापक अशा सहा जणांविरुद्ध गुन्हा दाखल झाला आहे.
शासकीय धान्य गोदामात गहू, साखर, ज्वारीचा ३९१ क्विंटलचा अपहार झाला होता, याची किंमत ७ लाख २७ हजार रुपये होती. या प्रकरणी भुसावळचे तत्कालीन प्रांताधिकारी कुमार चिंचकर, तत्कालीन तहसीलदार विशाल नाईकवाडे, तत्कालीन तहसीलदार भाऊसाहेब थोरात, बोदवड येथील तत्कालीन तहसीलदार रवींद्र जोगी, प्रभारी तहसीलदार एस. यू. तायडे आणि तत्कालीन गोदाम व्यवस्थापक आर. एल. राठोड यांच्याविरोधात. शुक्रवारी रात्री उशिराने अपहार आणि फसवणुकीचा गुन्हा दाखल झाला आहे.
दरम्यान, याबाबत अॅड. आशिष प्रमोद गिरी यांनी न्यायालयात फिर्याद दिली होती. त्यानंतर न्यायालयाकडून भुसावळ शहर पोलिस ठाण्यात फिर्याद प्राप्त झाल्यावर गुन्हा दाखल करण्यात आला आहे. हा गुन्हा दाखल झाल्यामुळे जिल्ह्यातील महसूल विभागात प्रचंड खळबळ उडाली आहे.
