मुक्ताईनगर (प्रतिनिधी) गुजरात राज्यातील एका दुकानदारासह त्याच्या मित्राला औषध देण्याचा बहाणा दाखवत मुक्ताईनगर तालुक्यातील मधापुरी गावात बोलावत चाकूसह बंदूक आणि काठ्यांचा धाक दाखवत मारहाण करीत 15 लुटारूंनी दीड लाखांची रोकड, मोबाईल, सोन्याची चैन असा एकूण दोन लाख 59 हजार 599 रुपये किंमतीचा मुद्देमाल लांबवला. ही धक्कादायक घटना मंगळवार, 1 डिसेंबर रोजी सकाळी साडेआठ ते साडेअकरा दरम्यान घडली.
औषध देण्याच्या बहाण्याने लूट
दर्शन बिपीनभाई सौलंकी (32, जांगीपूरा, ब्रिजलजवळ, डबोली, सुरत गुजरात) हा तरुण दुकान चालवून आपला उदरनिर्वाह करतो. मुक्ताईनगर तालुक्यातील मधापुरी गावातील संशयीत सुरेश चव्हाण याने दर्शन सौलंकी याला औषध घेण्याचा बहाणा करून मधापुरी गावात बोलावल्याने मंगळवार, 1 डिसेंबर रोजी सकाळी 8.30 वाजता मधापुरी गावात मित्र विशाल उगाभाई गलचर याच्यासोबत आला. दरम्यान, दर्शन हा सुरेशला भेटल्यानंतर विशाल उगाभाई गलचर याच्यासोबत आला. दरम्यान, दर्शन हा सुरेशला भेटल्यानंतर त्याच्यासह इतर 10 ते 15 जणांनी तोंडावर रूमाल बांधून बंदुकीसह चाकू व काठ्यांचा धाक दाखवत दर्शनचा मित्र विशाल गलचर याला बेदम मारहाण केली व त्याच्या खिश्यातील दीड लाखांची रोकड काढून घेतली.
ऑनलाईनदेखील रक्कम लांबवली
त्यानंतर भारत प्रवीण पवार यांच्या बँक खात्याशी संलग्न असलेल्या शुभम पाटील यांच्या मोबाईलवर (8668728436) गुगल पे वरून 49 हजार 999 रुपये पाठविले तसेच विशाल गलचरच्या गळ्यातील 15 ग्रॅमची सोन्याची चैन काढून घेतली. एकूण दोन लाख 59 हजार 599 रुपये किंमतीचा मुद्देमाल जबरीने हिसकावून घेतल्याप्रकरणी पाच दिवसानंतर दर्शन सौलंकी यांनी मुक्ताईनगर पोलिस ठाण्यात धाव घेत तक्रार दिल्याने संशयीत सुरेश चव्हाण यांच्यासह दहा ते पंधरा जणांविरुद्ध मुक्ताईनगर पोलिस ठाण्यात गुन्हा दाखल करण्यात आला. पुढील तपास पोलिस उपनिरीक्षक राहुल बोरकर करीत आहे.
