जळगाव (प्रतिनिधी) शहरातील अजय कॉलनीतील प्रा.डी.डी.बच्छाव यांच्या बंगल्यावर सोमवारी रात्री दरोड्याचा अयशस्वी प्रयत्न झाला होता. कथित दरोडेखोरांनी घटनेत खेळण्यातील बंदूक वापरली. अगदी एक दिवसआधी रेकी करूनही त्यांचा प्लॅन फेल झाल्यामुळे दरोडेखोर सराईत नसून भामटे असल्याची शक्यता वर्तविण्यात येत आहे.
दरोडेखोर स्थानिक असण्याची अधीक शक्यता
जळगाव शहरातील प्रसिद्ध व्यापारी प्रा.डी.डी.बच्छाव यांच्या अजय कॉलनी येथील बंगल्यावर सोमवार(ता.१४) रेाजी सहा ते सात दरोडेखोरांनी रात्री ९ वाजता हल्ला चढवला होता. मात्र, आरडाओरड झाल्याने भांबावलेल्या दरोडेखोरांनी बंगल्यातून पळ काढला. पळून जातांना एकाच्या पाठीवरील सॅग पडली होती. ती, सॅग पेालिसांनी जप्त केली असून त्यातून मिरचीपुड, दोरीसह धारदार चाकू मिळून आला असून तो, पोलिसांनी जप्त केला होता. जिल्हापेठ पोलिस ठाण्यात दाखल या गुन्ह्याचा तपास जिल्हापेठ पोलिसांहसह स्थानिक गुन्हेशाखा करत आहे.
पोलिसांनी संकलीत सीसीटीव्ही फुटेज, इतर तांत्रिक माहितीवरुन दरोडेखोर स्थानिक असण्याची अधीक शक्यता असून गुन्हेशाखेचे वरिष्ठ पोलीस निरीक्षक किसनराव नजनपाटील, उपनिरीक्षक अमोल देवडे, उपनिरीक्षक चौबे यांचे दोन स्वतंत्रपथके या संशयीतांच्या मागावर आहेत. तर दरोडोखोरांचे दोन ठिकाणचे सीसीटीव्ही फुटेज पोलिसांना मिळाले असून डम्प डाटाच्याआधारावर काही संशयित रडारवर देखील आहेत.
आदल्या दिवशीच रेकी, दरोडेखोर सीसीटीव्हीत कैद !
प्रा.डी.डी.बच्छाव हे राहत असलेला परिसर साधारण साडेआठ वाजेच्या सुमारासच सामसुम होते. जो-तो नोकरी कामावरुन परतल्यानंतर आप-आपल्या घरात असतो नेमक्या याच वेळेस सीसीटीव्हीत चित्रीत झालेले दरोडेखोर आदल्यादिवशी पाहणीसाठी आले असल्याची माहिती समोर आली आहे. बच्छाव यांचे वॉचमन कुत्र्याला फिरवायला केव्हा जातात याची देखील माहिती घेत नेमका तीच वेळ साधुन दरोड्याचे नियोजन करण्यात आले होते. दरम्यान, पोलिसांनी केलेल्या तपासात दरोडेखोर सीसीटीव्हीत कैद झाले असून काही संशयास्पद मोबाईल नंबर रडारवर आले असून लवकरच दरोडेखोर पोलिसांच्या ताब्यात येण्याची शक्यता वर्तविण्यात येत आहे.
किरण बच्छाव यांच्या हिंमतीमुळे दरोडेखोर भेदरले
दरोडेखोरांनी बच्छाव दाम्पत्याला दोरीच्या सहाय्याने बांधण्याचा प्रयत्न केला. किरण बच्छाव यांच्या मुलाला दरोडेखोर यांनी पकडण्याचा प्रयत्न केला. त्यावर बच्छाव यांनी मुलाला काही झाले तर याद राखा असा इशारा दिला, यामुळे दरोडेखोर भेदरले. त्यातच जोरजोरात आरडा-ओरड होत असल्यामुळे बाहेर उभा एक दरोडेखोर इतरांना लवकर निघा, लवकर निघा म्हणत होता. तेवढ्यात बच्छाव दाम्पत्याने आणखी जोरजोरात आरडा-ओरड केली. दरोडेखोरांनी घराचा मागचा दरवाजा कुठे आहे?, अशी विचारणा केली. बच्छावांनी मागे दरवाजा नाही, असे सांगितल्यावर दरोडेखोरांनी पुढच्या मुख्य दरवाजाने घरातून पळ काढला. दरम्यान, यानंतर अपर पोलीस अधीक्षक चंद्रकांत गवळी यांच्यासह स्थानिक गुन्हेशाखा, जिल्हापेठ आणि रामानंदनगर पोलिसांचा ठाण्याचा फौजफाटा बच्छाव यांच्या घरी पोहचला होता.
