जळगाव (प्रतिनिधी) शेअर मार्केटमध्ये गुंतवणूक केल्यास नफ्याचे अमिष दाखवून शेतकऱ्याची ४२ लाख १५ हजार रुपयांमध्ये तर निवृत्त लिपिकाला खोटे कागदपत्र पाठवून गुन्हा दाखल करण्याची धमकी देत १८ लाखात गंडविले. ही घटना शनिवारी उघडकीस आल्यानंतर संबंधितांनी सायबर पोलिसात तक्रार दिली. त्यानुसार ऑनलाईन ठगांविरुद्ध गुन्हा दाखल करण्यात आला आहे.
शहरातील एका परिसरात ६५ वर्षीय शेतकरी वास्तव्यास आहे. त्यांच्यासोबत एका संशयिताने दि. १३ ऑक्टोबर ते दि. ७ डिसेंबर या दरम्यान संपर्क साधला. तसेच एका अॅप्लीके शनद्वारे ट्रेडिंग प्लॅटफॉर्ममध्ये शेतकऱ्याची वैयक्तिक माहिती भरून घेतली. त्यानंतर त्यांना एका ग्रुपमध्ये देखील अॅड केले. त्यात त्यांना शेअर ट्रेडिंगविषयी माहिती देऊन त्याद्वारे अधिक नफ्याचे अमिष दाखविले. सुरुवातीला पाच लाख रुपयांच्या गुंतवणुकीवर सहा लाख रुपये नफा देण्यात आला. गुंतवलेल्या रकमेच्या दुपटीपेक्षा अधिक नफा मिळत असल्याने शेतकरी हे त्यामध्ये अधिक गुंतवणूक करीत गेले गुंतवलेल्या रकमेवर त्यांना परतावा मिळत नव्हता. असे करता-करता वेळोवेळी शेतकऱ्याने एकूण ४२ लाख १५ हजार रुपये समोरील व्यक्तीच्या बँक खात्यात आरटीजीएस व एनईएफटीद्वारे भरले. मात्र नंतर त्यांना नफा तर दूरच मुद्दल रक्कमही परत मिळत नसल्याने सायबर ठगांनी आपली फसवणूक केल्याचे लक्षात आल्यानंतर शेतकऱ्याने सायबर पोलिस ठाण्यात फिर्याद दिली. त्यावरून रिथिका देवी नामक व्यक्तीविरुद्ध गुन्हा दाखल करण्यात आला.
दुसऱ्या घटनेत एका शिक्षण संस्थेतून निवृत्त झालेल्या कर्मचाऱ्यासोबत दि. १९ ते दि. २५ नोव्हेंबरदरम्यान राहुल गुप्ता व त्याचा असिस्टंट संदीप राव असे नाव सांगणाऱ्यांनी संपर्क साधला. त्यांना न्यायालयाची खोटी ऑर्डर व खोटे कादगपत्र त्यांच्या व्हॉटसअॅपवर पाठवून गुन्हा दाखल करण्याची धमकी दिली. त्यामुळे घाबरलेल्या निवृत्त कर्मचाऱ्याकडे समोरील व्यक्तींनी पैशांची मागणी केली. दरम्यान, त्यांनी वेळोवेळी सुमारे १८ लाख रुपये आरटीजीएसद्वारे पाठविले. समोरील व्यक्तींनी आपली फसवणूक केल्याचे लक्षात आल्यानंतर संबंधित निवृत्ताने सायबर पोलिस ठाण्यात फिर्याद दिली. त्यावरून दि. ७ डिसेंबर रोजी दोघांविरुद्ध गुन्हा दाखल करण्यात आला. पुढील तपास पोलिस निरीक्षक नीलेश गायकवाड करीत आहेत.
