पुणे (वृत्तसंस्था) पुणे-सोलापूर राष्ट्रीय महामार्गावर कुरकुंभ येथील औद्योगिक वसाहतमध्ये भयंकर अपघात घडल्याची घटना समोर आली आहे. औद्योगिक वसाहतीमधील मुख्य चौकात रस्ता ओलांडणाऱ्या परप्रांतीय कुटुंबातील सहा जणांना महामार्गावरून भरधाव जाणाऱ्या अज्ञात वाहनाने चिरडले. या अपघातात तीन जण जागीच ठार झाले, तर तीन जण जखमी झाले आहेत.
काल सायंकाळच्या सुमारास पुणे-सोलापूर राष्ट्रीय महामार्गावर पुण्याकडून सोलापूरकडे जाणाऱ्या लेनवर कुरकुंभ येथील एसबीआय बँकेजवळील चौकानजिक महामार्ग ओलांडणाऱ्या सहा जणांना अज्ञात वाहनाने चिरडल्याची घटना घडली. या अपघातातील मृत व्यक्ती परप्रांतीय कामगार असल्याची प्राथमिक माहिती मिळाली आहे. मात्र मृतांची नावे अद्याप समजू शकली नाही. या अपघाताची माहिती मिळताच पोलीस तत्काळ घटनास्थळी दाखल झाले. यानंतर रुग्णवाहिकेच्या साह्याने जखमींना रुग्णालयात उपचारासाठी नेण्यात आले. या अपघातानंतर वाहतूक काही काळ ठप्प झाली होती. पोलिसांनी प्रयत्न करून वाहतूक पूर्ववत केली. हा अपघात कोणत्या वाहनामुळे झाला हे अद्याप समजू शकले नाही. याबाबत गुन्हा दाखल करण्याचे काम सुरू आहे.
