चाळीसगाव (प्रतिनिधी) राज्यात विधानसभा निवडणुकीची रणधुमाळी सुरू असून जागा वाटपासाठी सर्वच राजकीय पक्षांमध्ये बैठकांचे सत्र सुरू आहे. अशातच आजपासून उमेदवारी अर्ज भरण्याची प्रक्रिया सुरू झाली आहे. त्यातच चाळीसगाव तालुक्यात जामडी येथे जिल्हा नाकाबंदी दरम्यान 7 लाख 22 हजार 500 रुपयांची रोकड सापडल्याने खळबळ उडाली आहे. दरम्यान जळगाव जिल्ह्यातील रोख रक्कम जप्त करण्याची ही पहिलीच कारवाई आहे.
सविस्तर माहिती अशी की, चाळीसगाव ग्रामीण पोस्टेचे पोलीस निरीक्षक राहुल कुमार पवार तसेच ग्रामीण पोलीस स्टेशनचे पोलीस स्टाफसह नाकाबंदी करत असताना नागद होऊन चाळीसगावच्या दिशेने येणाऱ्या महिंद्रा TUV 300 GJ 19 Am0788 या गाडीची तपासणी केली. यावेळी गाडीत 7 लाख 22 हजार 500 रुपये मिळून आले. सदर रक्कमेबाबत कोणतीही अधिकृत कागदपत्रे सादर न केल्यामुळे व सोबत न बाळगल्यामुळे सदरची रक्कम ही पुढील कारवाई कामी जप्त करण्यात आली आहे. निवडणूक निर्णय अधिकारी यांच्यामार्फत ट्रेझरी शाखा येथे जमा करण्यात आली आहे. आता आगामी विधानसभा निवडणुकीच्या पार्श्वभूमीवर जळगाव जिल्ह्यातील रोख रक्कम जप्त करण्याची ही पहिलीच कारवाई आहे.
ही कारवाई पोलीस अधीक्षक डॉ. महेश्वर रेड्डी व अप्पर पोलीस अधीक्षक चाळीसगाव भाग कविता नेरकर व उपविभागीय पोलीस अधिकारी धनंजय येरुळे यांच्या मार्गदर्शनाखाली पोनि राहुल कुमार पवार, पोलीस हवालदार गोवर्धन बोरसे, कैलास पाटील, संदीप पाटील, पोलीस कॉन्स्टेबल अकरम बेग, मनोज चव्हाण, प्रदीप पवार व ग्रामविकास अधिकारी आबासाहेब माळी यांनी केली आहे.
