नोएडा वृत्तसंस्था : दूरसंचार विभागाच्या एका निवृत्त अभियंत्याला एका ग्रुपमध्ये सहभागी करून तब्बल ७५ लाख रुपयांची फसवणूक केल्याचे समोर आले आहे.
फसवणूक झालेली व्यक्ती ७१ वर्षांची आहे. पीडित व्यक्तीने सायबर गुन्हे पोलीस ठाण्यात फसवणुकीची तक्रार दाखल केली आहे. त्याने फसवणुकीची रक्कम ज्या खात्यांमध्ये हस्तांतरित केली होती, त्या खात्यांचा तपास सुरू आहे. पोलीस उपआयुक्त (सायबर गुन्हे) शैव्या गोयल यांनी सांगितले की, आलोक सहदेव यांनी दिलेल्या तक्रारीनुसार त्यांना व्हॉट्सअॅपवरील एका गुंतवणूक गटात जोडण्यात आले होते. त्या ग्रुपचे नाव ‘वेल्थ अलायन्स’ होते. शेअर बाजार व आयपीओंमध्ये गुंतवणूक करून प्रचंड नफा कमावत असल्याचा दावा या ग्रुपमध्ये केला जात होता. ग्रुपमधील सदस्य नियमितपणे नफ्याचे आणि ट्रेडिंगच्या माहितीचे स्क्रीनशॉट शेअर करत असत, ज्यामुळे तक्रारदाराचा आत्मविश्वास वाढला. ग्रुपमधील सदस्यांनी त्याला एक ट्रेडिंग अॅप डाऊनलोड करायला लावले. सुरुवातीला थोडी रक्कम गुंतवली आणि त्यावर ८ हजार रुपयांचा नफासुद्धा कमावला. त्यानंतर आरोपीने त्यांना मोठी रक्कम गुंतवण्यासाठी प्रवृत्त केले आणि हळूहळू ते पैसे विविध बँक खात्यांमध्ये हस्तांतरित केले.
तक्रारदाराला मोठ्या प्रमाणात शेअर्स बहाल करण्यात आले असून जर त्यांनी अतिरिक्त रक्कम जमा केली नाही, तर त्यांच्या खात्याचे व्यवहार गोठवले जातील, असा धाक आरोपीने दाखवला. जेव्हा त्यांनी पैसे देण्यास नकार दिला, तेव्हा त्यांचे अॅप खाते ब्लॉक करण्यात आले, तसेच त्यांना व्हॉट्सअॅप ग्रुपमधून काढून टाकण्यात आले. त्यांना दाखवण्यात आलेला संपूर्ण नफा गायब झाला होता. अशा प्रकारे या निवृत्त अभियंत्याची ७५ लाख ६४ हजारांची फसवणूक झाली.
