सिल्लोड (वृत्तसंस्था) वाढदिवसाच्या पार्टीनंतर जेवणाच्या बिलाचे पैसे देण्यावरून झालेल्या वादात युवकाचा खून करणाऱ्या हॉटेल चालक कुकला सिल्लोड ग्रामीण पोलिसांनी अवघ्या काही तासांतच मोठ्या शिताफीने अटक केली.
वांजोळा (ता. सिल्लोड) येथील संतोष जादूसिंग बामणावत-राजपूत (२५) याने वाढदिवस असल्याने सिल्लोड शहरानजीक असलेल्या समर हॉटेल येथे शुक्रवारी रात्री मित्रांना जेवणाची पार्टी देण्याचे कबूल केले होते. त्यामुळे त्याने पटापट काम आटोपून मित्रांना डोंगरगाव फाट्यावरील हॉटेल गारवा येथे बोलावले होते. रात्री सर्वांनी संतोष वाढदिवस साजरा करून जेवण केले. त्यानंतर सर्व मित्र घरी निघून गेले. मात्र, संतोष बिल देण्यासाठी मागे थांबला होता.
पार्टीचे बिल देण्यावरून हॉटेल चालक संकेत अनिल जाधव व कुक गजानन दणके यांच्याशी वाद झाला. या वादातून हाणामारी होऊन संकेत जाधव व गजानन दणके यांनी संतोषला चाकूने भोसकले. यात संतोष जागीच ठार झाला. यानंतर या दोघांनी त्याचा मृतदेह हा हॉटेलशेजारील एका कालव्यात फेकून दिला. दुसऱ्या दिवशी शनिवारी सकाळी मृतदेह आढळल्याने खळबळ उडाली.
खुनाची माहिती मिळताच ग्रामीण पोलिस ठाण्याचे पोलिस निरीक्षक सीताराम मेहेत्रे यांनी पोलिस कर्मचाऱ्यांसह धाव घेऊन पंचनामा केला. घटनास्थळी श्वानपथकालाही पाचारण करण्यात आले होते. पोलिसांनी मृतदेह सिल्लोड उपजिल्हा रुग्णालयात पाठविला. यावेळी रुग्णालयात नातेवाइकांनी मोठी गर्दी केली होती. याप्रकरणी ग्रामीण रुग्णालयात गुन्हा दाखल करण्यात आला आहे.
खून झालेल्या तरुणाचा पार्टीत त्याच्या सोबतच्या मित्रांसोबत काही वाद झाला होता का, त्याच्या सोबत कोण कोण होते, असा प्रश्न पोलिसांना पडला होता. मित्रांपैकीच कोणीतरी खून केला असावा, असा पोलिसांना संशय होता. त्यावरून सर्व मित्रांना ताब्यात घेऊन चौकशी करण्यात आली.
मात्र तपासाअंती हा खून हॉटेलचालक व कूकने केल्याचे समोर आले. सदर युवक जेवणाचे बिल देत नसल्याने खून केल्याचे आरोपींनी कबूल केले. त्यानुसार हॉटेल चालक संकेत अनिल जाधव (२१, रा. भीम भावसिंगपूरा, छत्रपती संभाजीनगर, हल्ली मुक्काम व स्नेहनगर, सिल्लोड) व हॉटेलचा कूक गजानन यादवराव दनके (२४, रा. चिंचोली नकीब (ता. फुलंब्री) या दोघांना पोलिसांनी अटक केली आहे.
