वराड, ता. धरणगाव (प्रतिनिधी) वराड येथे लग्नसमारंभात नाचण्याच्या किरकोळ कारणावरून नवरदेव व नवरी या दोन्ही वऱ्हाडींमध्ये तुंबळ हाणामारी झाल्याची घटना बुधवारी घडली. यामुळे काही काळ गावात तणाव निर्माण झाला होता.
वराड येथील मारवाडी गल्लीत भिल्ल समाज बांधवांकडे लग्न होते. दरम्यान, बुधवारी दुपारी नवरदेव पारावर आला. त्यानंतर बग्गीत बसून नरवरदेव व नवरी विवाह मंडपाकडे सवाद्य मिरवणुकीने जात होते. याच वेळी नवरदेव व वधूकडील वऱ्हाडींमध्ये नाचण्याच्या कारणावरुन वाद झाले. या वादाचे पर्यवसन हाणामारीत झाले. यात दोघांकडील वऱ्हाडींनी एकमेकांना
लाठ्या-काठ्या व दगड मारले. यानंतर वधूला खाली उतरवून वऱ्हाडींनी गाडीकडे धाव घेतली. तर नवरदेव ही दुचाकीवर ही बसून लग्न समारंभाच्या ठिकाणी निघून गेला. तर हे दृष्य पाहून बग्गीवाल्यांनी ही पळ काढला. या वेळी वधूकडील काही नातेवाईकांनी वधूला घरी नेण्याचा प्रयत्न केला. परंतु, यानंतर काही ग्रामस्थांनी मध्यस्थी करुन दोघाकडील वऱ्हाडींना शांत केले. दरम्यान, पोलीस पाटलांनी पाळधी पोलिसांशी संपर्क साधून घटनेची माहिती दिली. त्यानंतर तत्काळ पाळधी पोलीस घटनास्थळी दाखल झाले अन् ग्रामस्थ व पोलिसांनी दोन्हीकडील वऱ्हाडींची समजूत काढली. यशस्वी मध्यस्थी झाल्यानंतर लग्न लागल्यावर दोन्हीकडील वऱ्हाडी आपापल्या घराकडे शांततेत परतले. परंतु, या घटनेमुळे ग्रामस्थ चांगलेच धास्तावले होते. पोलीस उशिरापर्यंत घटनास्थळी थांबून होते.
