मुंबई (वृत्तसंस्था) राष्ट्रवादी काँग्रेसचे अध्यक्ष शरद पवार यांना सोशल मीडियावरून धमकी दिल्याप्रकरणी गुन्हा दाखल करण्यात आला आहे. तर, दुसरीकडे शिवसेना ठाकरे गटाचे नेते खासदार संजय राऊत यांना जीवे मारण्याची धमकी देणाऱ्या दोघांना पोलिसांनी ताब्यात घेतले आहे. दरम्यान, राऊत यांना धमकी देणारा दारूच्या नशेत होता, अशी माहिती उपमुख्यमंत्री देवेंद्र फडणवीस यांनी दिलीय.
राष्ट्रवादी काँग्रेस आक्रमक !
राज्याच्या राजकारणात आज दोन मोठ्या नेत्यांना जीवे मारण्याची धमकी आल्याने एकच खळबळ उडाली होती. शरद पवार यांना राजकारण महाराष्ट्राचं या नावाच्या ग्रुपवर तुमचा दाभोळकर करु अशा आशयाची जीवे मारण्याची सोशल मीडियावरून देण्यात आली होती. यानंतर राष्ट्रवादी काँग्रेस आक्रमक झाली असून खासदार सुप्रिया सुळे यांच्या नेतृत्वात राष्ट्रवादीच्या शिष्टमंडळानं पोलीस आयुक्तांची भेट घेत याबाबत सखोल चौकशी करुन कारवाई करण्याची मागणी केली होती.
पवारांना धमकी देणारा भाजपचा कार्यकर्ता असल्याचा आरोप !
पोलिसांनी तात्काळ नर्मदाबाई पटवर्धन आणि सौरभ पिंपाळकर या दोघांविरुद्ध भादंवि कलम 153 A, 504, 506(2) अंतर्गत गुन्हा दाखल केला. तर या प्रकरणाचा तपास मुंबई गुन्हे शाखा करत आहे. शरद पवार यांना धमकी देणारा 26 वर्षीय सौरभ पिंपाळकर हा भाजपचा कार्यकर्ता असल्याचा आरोप केला जातोय. त्याच्या ट्विटरवर ‘आय ॲम बीजेपी ॲक्टिव्हिस्ट, आय हेट सेक्यूलेरिझम’ असं लिहून ठेवलं आहे. तसंच त्याचे भाजपचे महाराष्ट्र प्रदेशाध्यक्ष चंद्रशेखर बावनकुळे आणि केंद्रीय मंत्री रावसाहेब दानवे यांच्यासोबत फोटो असल्याचं समोर आलं आहे. विशेष म्हणजे राष्ट्रवादीचे आमदार अमोल मिटकरींनी एक फोटोच शेअर केलाय.
राऊत यांना धमकी देणारे दोघं ताब्यात !
दुसरीकडे ठाकरे गटाचे नेते खासदार संजय राऊत यांचे बंधू भांडूप मतदार संघाचे आमदार सुनील राऊत यांना एका अज्ञाताने कॉल करुन “सकाळी 9 वाजेचा भोंगा बंद करा, नाही दोन्ही भावांना गोळ्या घालू”, अशी धमकी दिली होती. यानंतर संजय राऊत यांनी पोलिसांना याबातची माहिती दिली. या प्रकरणात दोन जणांना पोलिसांनी ताब्यात घेतले आहे. ताब्यात घेण्यात आलेले दोन्हीही गोवंडीतील राहणारे आहेत. नशेच्या धुंदीत त्यांनी ही धमकी दिली असल्याची प्राथमिक माहिती आहे. अगदी गृहमंत्री देवेंद्र फडणवीस यांनी देखील राऊत यांना धमकी देणारा दारूच्या नशेत होता, अशी माहिती दिलीय.
